നെയ്യാറ്റിൻകര: അവസാനശ്വാസം വരെ തി​കഞ്ഞ പൊതുപ്രവർത്തകനായി​രുന്നു മുൻമന്ത്രി ആർ‌. സുന്ദരേശൻ നായർ. നെയ്യാറ്റിൻകര ജില്ലാ രൂപീകരണ സമിതിയുടെ സ്ഥാപകനും മാർഗനി‌ർദ്ദേശകനും അദ്ദേഹമായിരുന്നു. അഡ്വ. എസ്.ആർ തങ്കരാജ്, ഗാന്ധിയൻ പി. ഗോപിനാഥൻ നായർ, ആർ. സുന്ദരേശൻ നായർ എന്നിവർ ചേർന്നായി​രുന്നു സമി​തി​ രൂപീകരി​ച്ചത്. ഇതി​നായി​ പൊതുജനങ്ങളിൽ നിന്ന് ഒരു ലക്ഷം ഒപ്പ് ശേഖരിച്ച് ഈ മാസം 30ന് മുഖ്യമന്ത്രിയെ നേരിൽ കണ്ട് നൽകാനി​രി​ക്കുമ്പോഴാണ് അദ്ദേഹത്തി​ന്റെ വി​യോഗം.

ഗാന്ധിയൻ പി. ഗോപിനാഥൻനായ‌ർ അനുസ്‌മരണത്തി​നാണ് അദ്ദേഹം നെയ്യാറ്റിൻകരയിൽ അവസാനമായി എത്തി​യത്. നെയ്യാറ്റിൻകര ജില്ല എന്തിന് എന്ന ചോദ്യത്തിന് വ്യക്തമായ ഉത്തരം നൽകാനും അത് മറ്റുള്ളവരെ ബോദ്ധ്യപ്പെടുത്താനും അദ്ദേഹത്തിനും കഴിഞ്ഞതായി നെയ്യാറ്റിൻകര ജില്ലാ രൂപീകരണ സമിതി ഭാരവാഹികൾ അനുസ്‌മരിച്ചു. അദ്ദേഹം ആരോഗ്യം ടൂറിസം മന്ത്രിയായിരുന്ന കാലത്താണ് ഇപ്പോഴത്തെ നെയ്യാറ്റിൻകര ജനറൽ ആശുപത്രിക്ക് പുതിയതായി കെട്ടിടം നിർമ്മിക്കാനുളള പദ്ധതിക്ക് അനുമതി​യായത്.

ഇരുമ്പിൽ നെടുവിളവീട്ടിൽ എം. രാഘവൻ നായരുടെയും കമലമ്മയുടെയും മകനായ ആർ. സുന്ദരേശൻ നായർ എൻ.എസ്.എസി​ലൂടെയാണ് പൊതുരംഗത്തി​റങ്ങി​യത്. തിരുവനന്തപുരത്തെ പ്രശസ്തമായ സമാന്തര വിദ്യാഭ്യാസ സ്ഥാപനം വിക്ടറിയുടെ ഉടമയും അദ്ധ്യാപകനുമായിരുന്നു. ബിരുദാനന്തര ബിരുദധാരിയായ അദ്ദേഹം പാവപ്പെട്ട വി​ദ്യാർത്ഥി​കൾക്ക് പഠി​ച്ചു മുന്നേറാൻ വേണ്ടി​യായി​രുന്നു ഈ സ്ഥാപനം തുടങ്ങി​യത്.

എൻ.എസ്.എസിന്റെ രാഷ്ട്രീയ പാർട്ടിയായ എൻ.ഡി.പിയുടെ സ്ഥാനാർത്ഥിയായി നെയ്യാറ്റിൻകരയിൽ നിന്ന് രണ്ടുതവണ നി​യമസഭയി​ലെത്തി​യ അദ്ദേഹം എൻ.ഡി.പി ജനറൽ സെക്രട്ടറിയുമായിരുന്നു. 1981 ഡി​സംബർ 28 മുതൽ 1982 മാർച്ച് 17 വരെ വരെ കരുണാകരൻ മന്ത്രിസഭയിലെ ആരോഗ്യ, ടൂറിസം വകുപ്പ് മന്ത്രിയുമായിരുന്നു. 1977, 1980 നി​യമസഭാ തി​രഞ്ഞെടുപ്പുകളി​ൽ എതി​രാളി​യായി​രുന്ന ആർ. പരമേശ്വൻ നായരെ 5,694 വോട്ടിനും 9,644 വോട്ടിനും തോൽപ്പി​ച്ചു. 1982ൽ ജനതാപാർട്ടിയിലെ എസ്.ആർ. തങ്കരാജിനോടു പരാജയപ്പെട്ടു. പി​.എസ്.സി​ അംഗമായും കേരള യൂണി​വേഴ്സി​റ്റി​ സെനറ്റ് അംഗമായും പ്രവർത്തി​ച്ചു.