നെയ്യാറ്റിൻകര: നെയ്യാറ്റിൻകരയിൽ ശ്രീകൃഷ്ണജയന്തി ആഘോഷത്തിനുള്ള ഒരുക്കങ്ങൾ പൂർത്തിയായി. മഹാശോഭയാത്ര ഇന്ന്.

വൈകിട്ട് 3ഓടെ പെരുംമ്പഴുതൂർ മണ്ഡലത്തിലെ ചെറുശോഭ യാത്രകൾ പെരുമ്പഴുതൂരിൽ സംഗമിച്ച് മണ്ഡലം ശോഭായാത്രകളും ആറാലുംമൂട്, അമരവിള, ഓലത്താന്നി എന്നിവിടങ്ങളിൽ നിന്നുമുള്ള ശോഭായാത്രകൾ പുറപ്പെട്ട് നെയ്യാറ്റിൻകര ടി.ബി ജംഗ്ഷനിൽ സംഗമിക്കും. ടി.ബി ജംഗ്ഷനിൽ നിന്ന് മഹാശോഭ യാത്രയായി നഗരം ചുറ്റി നെയ്യാറ്റിൻകര ശ്രീകൃഷ്ണസ്വാമി ക്ഷേത്രത്തിൽ എത്തിച്ചേരും.

നൂറ് കണക്കിന് ഉണ്ണിക്കണ്ണൻമാരും, രാധമാരും, മറ്റ് പുരാണ കഥാപാത്രങ്ങളും ഫ്ളോട്ടുകളും ശോഭയാത്രയിൽ അണിനിരക്കും. തുടർന്ന് സാംസ്കാരിക പരീക്ഷയുടെ സമ്മാനദാനവും പ്രസാദ വിതരണവും നടക്കും.

ഇന്നലെ ക്ഷേത്രത്തിൽ നടന്ന സംഗീതാ നാദാർച്ചന പ്രമുഖ സംഗീതജ്ഞ പ്രൊഫ. ഓമനക്കുട്ടിയമ്മ ടീച്ചർ ഉദ്ഘാടനം ചെയ്തു. ബാലഗോകുലം ജില്ലാ അദ്ധ്യക്ഷൻ രാകേഷ് ശങ്കർ, വെള്ളായണി അശോകൻ, എസ്.കെ. ജയകുമാർ, ചെങ്കൽ രാധാകൃഷ്ണൻ, സബ് ഗ്രൂപ്പ് ഓഫീസർ അരവിന്ദ് എസ്.ജി നായർ, നെയ്യാറ്റിൻകര കൃഷ്ണൻ, കവി ഉദയൻ കൊക്കോട് എന്നിവർ പങ്കെടുത്തു. ഉറിയടി, ഗോപൂജ, വൃക്ഷ പൂജ എന്നിവയും നടന്നു.