കല്ലമ്പലം: നാവായിക്കുളത്ത് റോഡ്‌ വക്കിൽ ചാക്കിൽ കെട്ടി ഉപേക്ഷിച്ച നിലയിൽ ചത്ത പോത്ത് കുട്ടിയെ കണ്ടെത്തി. നാവായിക്കുളം പി.എച്ച്.സിക്ക് സമീപം കഴിഞ്ഞ ദിവസം രാവിലെയായിരുന്നു സംഭവം. ദുർഗന്ധം വമിക്കുന്ന ചാക്കിൽ നിന്ന് രക്തം പുറത്തേക്ക് ഒഴുകുന്നത് കണ്ട നാട്ടുകാർ ഭയന്ന് വാർഡ്‌ മെമ്പർ അശോകനെ അറിയിക്കുകയായിരുന്നു. അദ്ദേഹം സ്ഥലത്തെത്തി പൊലീസിനെ അറിയിക്കുകയും പൊലീസിന്റെ നിർദ്ദേശാനുസരണം ചാക്കിന്റെ കെട്ട് അഴിച്ചു നോക്കിയപ്പോഴാണ് പ്രസവത്തിൽ ചത്ത രണ്ട് ദിവസം പഴക്കമുള്ള പോത്ത് കുട്ടിയാണെന്ന് മനസിലായത്. കുട്ടിയോടൊപ്പം മറുപിള്ളയും ഉണ്ടായിരുന്നു. സമീപത്തെ വീടുകളിലൊന്നും എരുമയില്ലാത്തതിനാൽ മറ്റെവിടെ നിന്നോ കുഴിച്ചിടുന്ന ബുദ്ധിമുട്ട് കൊണ്ട് വാഹനത്തിൽ കൊണ്ടുവന്ന് തള്ളിയതാകാമെന്ന് സംശയിക്കുന്നു. തുടർന്ന് മെമ്പറും നാട്ടുകാരും ചേർന്ന് വൈകിട്ടോടെ പോത്ത് കുട്ടിയെ കുഴിച്ചിട്ടു.