വെഞ്ഞാറമൂട്: മൊബൈൽ ഫോണിൽ സംസാരിച്ച് വാഹനമോടിച്ച കെ.എസ്.ആർ.ടി.സി സ്വിഫ്ട് ഡ്രൈവറെ അറസ്റ്റുചെയ്തു. തിരുവനന്തപുരത്തു നിന്ന് കോഴിക്കോട്ടേക്ക് യാത്രക്കാരുമായി പോയ കെ.എസ്.ആർ.ടി.സി ബസ് ഡ്രൈവർ വയനാട് സ്വദേശി അൻവർ സാദത്തിനെയാണ് വെഞ്ഞാറമൂടിന് സമീപം കാരേറ്റ് വച്ച് മോട്ടോർ വാഹന വകുപ്പ് എൻഫോഴ്സ്‌മെന്റ് വിഭാഗം പിടികൂടിയത്.

ബസ് യാത്രക്കാർ വിവരം എൻഫോഴ്സ്‌മെന്റ് ഉദ്യോഗസ്ഥരെ അറിയിച്ചതിനെ തുടർന്നാണ് നടപടി. യാത്രയ്ക്കിടയിൽ നിരവധി തവണ ഇയാൾ മൊബൈൽ ഫോൺ ഉപയോഗിച്ചിരുന്നതായും മോട്ടോർ വാഹന വകുപ്പ് ഉദ്യോഗസ്ഥർ കൈ കാണിക്കുമ്പോഴും ഇയാൾ മൊബൈൽ ഉപയോഗിച്ചിരുന്നതായി യാത്രക്കാർ പറയുന്നു. അപകടകരമായി ബസ് ഓടിച്ചതിന് മോട്ടോർ വാഹന നിയമപ്രകാരം കേസ് എടുത്തതായും ഡ്രൈവറുടെ ലൈസൻസിനെതിരെ നടപടിക്ക് ശുപാർശ ചെയ്തതായും മോട്ടോർ വെഹിക്കിൾ ഇൻസ്പെക്ടർ രാംജി കെ. കരൺ അറിയിച്ചു. അസി.മോട്ടോർ വെഹിക്കിൾ ഇൻസ്പെക്ടർമാരായ ലൈജു,അൻസാരി എന്നിവരും ഓപ്പറേഷനിൽ പങ്കെടുത്തു.