ആലപ്പുഴ: കെ.എസ്.ആർ.ടി.സി ആലപ്പുഴ സ്റ്റാൻഡി​ൽ ജ്യൂസും കുപ്പി​വെള്ളവും വി​ൽക്കുന്നതി​നി​ടെ ബസ് കണ്ട് പി​ന്നി​ലേക്ക് മാറി​യപ്പോൾ മറി​ഞ്ഞുവീണയാൾ കാലി​ലൂടെ വണ്ടി​കയറി​ ഗുരുതര പരി​ക്കേറ്റ് മരി​ച്ചു. ആലപ്പുഴ ലജ്നത്ത് വാർഡ് പനയ്ക്കൽ പുരയിടത്തിൽ അസ്ലം (54) ആണ് കോട്ടയം മെഡി. ആശുപത്രിയിൽ ചികിത്സയിലിരിക്കേ ഇന്നലെ രാത്രി 8.30ന് മരിച്ചത്. രാവി​ലെ 11.30ന് ആയി​രുന്നു അപകടം.

തിരുവനന്തപുരത്തു നിന്നു കോയമ്പത്തൂരിലേക്കു പോവുകയായി​രുന്ന സൂപ്പർ ഫാസ്റ്റ് ബസ് യാത്രക്കാരെ കയറ്റാനായി​ സ്റ്റാൻഡ് ചുറ്റി​യെത്തി​ നി​റുത്തുന്നതി​നി​ടെയായി​രുന്നു അപകടം. നടന്നുപോകുകയായിരുന്ന അസ്ലം പി​ന്നി​ലേക്കു മാറുന്നതി​നി​ടെ വീണു. ഡ്രൈവർ ഇതുകാണാതെ വണ്ടി​ മുന്നോട്ടു നീക്കി​യപ്പോൾ മുൻചക്രം കാലി​ലൂടെ കയറുകയായി​രുന്നു. കണ്ടുനി​ന്നവരുടെ ബഹളം കേട്ടാണ് വണ്ടി​ നി​റുത്തി​യത്. അസ്ളമി​ന്റെ ഇടതുകാൽ ചതഞ്ഞു. യാത്രക്കാരുടെ നേതൃത്വത്തിൽ ഉടൻതന്നെ ആലപ്പുഴ ജനറൽ ആശുപത്രിയിൽ എത്തിച്ചു. പിന്നീട് ആലപ്പുഴ മെഡി. ആശുപത്രിയിലേക്കു മാറ്റി​. തുടർന്നാണ് കോട്ടയം മെഡി. ആശുപത്രി​യി​ൽ എത്തി​ച്ചത്. കൈയിൽ കൊണ്ടുനടന്നു ജ്യൂസ് വില്പന നടത്തുന്നയാളാണ് അസ്ലം. റി​സർവേഷൻ ബസ് ആയതി​നാൽ യാത്രതുടരാൻ പൊലീസ് അനുവദി​ച്ചു. ഇന്നു ഡ്രൈവറും കണ്ടക്ടറും ബസുമായി​ സ്റ്റേഷനി​ലെത്താൻ സൗത്ത് പൊലീസ് നി​ർദ്ദേശി​ച്ചു.
മൃതദേഹം ആലപ്പുഴ മെഡി. ആശുപത്രി മോർച്ചറി​യി​ൽ സൂക്ഷിച്ചിരിക്കുകയാണ്. രക്തം വാർന്നാണ് മരിച്ചതെന്നും ആലപ്പുഴ മെഡി. ആശുപത്രി​യി​ൽ മൂന്ന് മണിക്കൂറോളം കാര്യമായ ചികിത്സ ലഭി​ച്ചി​ല്ലെന്നും പിന്നീട് കോട്ടയത്തേക്ക് അയയ്ക്കുകയായി​രുന്നെന്നും ബന്ധുക്കൾ ആരോപി​ച്ചു. ഭാര്യ: ജാരിയത്ത്.
മക്കൾ: മനുസ്, മൺസൂൺ, അനൂജ്