ആലപ്പുഴ: തദ്ദേശ സ്വയംഭരണ സ്ഥാപനങ്ങളിലെ മാലിന്യ ശേഖരണ വിവരങ്ങൾ ഡിജിറ്റലായി രേഖപ്പെടുത്തുന്നതിന്റെ ഭാഗമായുള്ള ഹരിത മിത്രം സ്മാർട്ട് ഗാർബേജ് മോണിറ്ററിംഗ് സിസ്റ്റത്തിന്റെ ക്യു ആർ കോഡ് പതിപ്പിക്കൽ മുഹമ്മ ഗ്രാമപഞ്ചായത്തിൽ ആരംഭിച്ചു. ക്യൂ ആർ കോഡ് സ്‌കാൻ ചെയ്താൽ വീട്ടിലെ മാലിന്യങ്ങളുടെ ഇനം, അളവ്, കൈമാറുന്ന തീയതി, യൂസർ ഫീസ്, ഹരിത കർമ്മ സേന പ്രവർത്തകരുടെ പെരുമാറ്റം എന്നിവ രേഖപ്പെടുത്താനാകും. പദ്ധതിയുടെ സാങ്കേതിക ചുമതല ഹരിത മിത്രം സ്മാർട്ട് ഗാർബേജ് ആപ്ലിക്കേഷൻ വികസിപ്പിച്ചെടുത്ത കെൽട്രോണിനാണ്. വാർഡ് തലം മുതൽ സംസ്ഥാന തലം വരെയുള്ള വിവരങ്ങൾ ഏകീകൃത പ്ലാറ്റ്‌ഫോമിലൂടെ നിരീക്ഷിക്കാം. പൊതുജനങ്ങളുടെ പരാതികൾ സ്വീകരിക്കുന്നതിനും ആപ്ലിക്കേഷനിൽ സംവിധാനമുണ്ട്. ഹരിതകർമ്മ സേന അംഗം സിന്ധു ഷിബുവിന്റെ വീട്ടിൽ ക്യു ആർ കോഡ് പതിപ്പിച്ച് മുഹമ്മ ഗ്രാമപഞ്ചായത്ത് പ്രസിഡന്റ് സ്വപ്ന ഷാബു പദ്ധതി ഉദ്ഘാടനം ചെയ്തു. പഞ്ചായത്ത് അംഗം വിനോമ്മ രാജു അദ്ധ്യക്ഷത വഹിച്ചു. പഞ്ചായത്ത് സെക്രട്ടറി പി.വി. വിനോദ്, അസിസ്റ്റന്റ് സെക്രട്ടറി സീമ റോസ്, കെൽട്രോൺ പഞ്ചായത്ത് കോ ഓർഡിനേറ്റർമാരയ സച്ചു.കെ.പ്രഭ, ബിനോയ് ബേബി, ഹരിത കർമ്മ സേന അംഗങ്ങൾ, പഞ്ചായത്ത് അംഗങ്ങൾ തുടങ്ങിയവർ പങ്കടുത്തു.