ചേർത്തല:താലൂക്കിന്റെ വിവിധ ഭാഗങ്ങളിൽ പാതയോരത്തു രാത്രി പാർക്കുചെയ്യുന്ന വാഹനങ്ങളുടെ ബാ​റ്ററി മോഷണം സ്ഥിരമാക്കിയ യുവാവിനെ പൊലീസ് പിടികൂടി.തിരുവനന്തപുരം വിഴിഞ്ഞം കോട്ടപ്പുറം കടക്കളംകോളനിയിൽ രഞ്ജിത്ത്(28)ആണ് പിടിയിലായത്.ജില്ലാ പൊലീസ് മേധാവിയുടെ നിർദ്ദേശ പ്രകാരം ബാ​റ്ററി മോഷണം കണ്ടെത്താൻ ചേർത്തല ഡിവൈ.എസ്.പി ടി.ബി വിജയന്റെ നേതൃത്വത്തിൽ പ്രത്യേക സംഘം രൂപീകരിച്ച് അന്വേഷണം ഉൗർജ്ജിതമാക്കിയിരുന്നു. ഈ സംഘമാണ് പ്രതിയെപിടികൂടിയത്.40 ഓളം ബാ​റ്ററികൾ ഇയാൾ വി​റ്റതടക്കം കണ്ടെത്തിയിട്ടുണ്ട്. അന്വേഷണ സംഘം കഴിഞ്ഞ ഒരാഴ്ചയായി നടത്തിയ പ്രത്യേക നീക്കത്തിലാണ് യുവാവുകുടുങ്ങിയത്.വിവിധ വശങ്ങളില 250ഓളം സി.സി.ടി.വി കാമറാദൃശ്യങ്ങൾ പരിശോധിച്ചാണ് അന്വേഷണം രഞ്ജിത്തിലേക്കെത്തിയത്.ടാക്സി ഡ്രൈവറായ രഞ്ജിത്ത് ഓട്ടം കഴിഞ്ഞു തിരിച്ചുപോരുംവഴിയാണ് പാതയോരത്തെ വാഹനങ്ങളിൽ നിന്നും ബാ​റ്ററികൾ മോഷ്ടിച്ചിരുന്നത്.മോഷ്ടിക്കുന്ന ബാ​റ്ററികൾ വിഴിഞ്ഞത്തെ വള്ളങ്ങൾക്കും ബോട്ടുകൾക്കുമായാണ് മറിച്ചുവി​റ്റിരുന്നത്.
ചേർത്തല താലൂക്കിനു പുറമെ കോട്ടയം ജില്ലയുടെ വിവിധ ഭാഗങ്ങളിൽ നിന്നും ഇയാൾ മോഷ്ടിച്ചിട്ടുണ്ടെന്നും കണ്ടെത്തിയിട്ടുണ്ട്.വിഴിഞ്ഞം സ്​റ്റേഷനിലും ഇയാൾക്കെതിരെ മോഷണകേസുണ്ട്.
പ്രത്യേക അന്വേഷണ സംഘത്തിലെ ഗിരീഷ്,അരുൺകുമാർ,പ്രവീഷ്,ശ്രീക്കുട്ടൻ,നിതിൻ,അനീഷ്‌,ബൈജു എന്നിവരും പട്ടണക്കാട് എസ്.ഐ നിധിൻരാജ്,സി.പി.ഒ രഞ്ജിത്ത് എന്നിവരാണ് അന്വേഷണത്തിന് നേതൃത്വം നൽകിയത്.