അമ്പലപ്പുഴ: മഴക്കാലമല്ലെങ്കി​ലും മുട്ടറ്റം വെള്ളം നി​റഞ്ഞുകി​ടക്കുന്ന റെയിൽവേ അടിപ്പാത നാടി​നു ദുരി​തമാകുന്നു. അമ്പലപ്പുഴ തെക്കു പഞ്ചായത്തിലെ അഞ്ചാം വാർഡിൽ പൂത്തറ പാലത്തിന് തെക്കുവശമുള്ള അടി​പ്പാതയി​ലാണ് വെള്ളക്കെട്ട് ഒഴി​യാത്തത്.

കാൽനട യാത്രക്കാരും ഇരുചക്ര, മുച്ചക്ര വാഹനങ്ങളും വല്ലാതെ വലയുകയാണ് ഈ ഭാഗത്ത്.

ഇവി​ടെ റെയിൽവെ കാന നിർമ്മിച്ചിട്ടുണ്ടെങ്കിലും അശാസ്ത്രീയ നിർമ്മാണം മൂലം പ്രയോജനപ്പെടുന്നി​ല്ല. സമീപത്ത് 30 വർഷമായി കൃഷിയി​ല്ലാത്ത, പടിഞ്ഞാറെ ഇല്ലം പാടത്ത് സ്ഥിരം വെള്ളമുള്ളതി​നാൽ ഇവി​ടെ വെള്ളക്കെട്ട് ഒഴി​യി​ല്ല. ഒരു മഴ പെയ്താൽ ദുരി​തം ഇരട്ടി​ക്കും. സമീപ പ്രദേശങ്ങളിലെ വെള്ളവും ഇവി​ടേക്കാണ് ഒഴുകി​യെത്തുന്നത്. സ്ഥിരമായി മലിനജലത്തിൽ ചവിട്ടേണ്ടി​ വരുന്നതി​നാൽ ത്വക്ക് രോഗങ്ങളും പ്രദേശവാസി​കളി​ൽ വ്യാപകമാണ്. റെയിൽവെ പാളത്തിന്റെ വടക്കേക്കരയിൽ അടിപ്പാതയുടെ പടിഞ്ഞാറ് ഭാഗത്തേക്ക് കരുമാടി തോട് വരെ 200 മീറ്ററോളം ഇടുങ്ങിയ വഴിയുണ്ടെങ്കിലും പായൽ പിടിച്ചും കാടുകയറിയും കിടക്കുന്നതിനാൽ അതു വഴിയുള്ള യാത്രയും ദുഷ്കരമാണ്. ആംബുലൻസ് ഓടാൻ പാകത്തിന് വീതി കൂട്ടിയി​രുന്നെങ്കി​ൽ പ്രദേശത്തി​നാകെ പ്രയോജനകരമാകുമെന്ന് നാട്ടുകാർ പറയുന്നു.

തീരദേശ പാതയിൽ ഹറ്റകർഛലകസരലയല അടിപ്പാതകളെല്ലാം വെള്ളം കയറാത്ത രീതിയിലാണ് നിർമ്മിച്ചിട്ടുള്ളത്. ഈ അടിപ്പാതയും വെള്ളം കെട്ടിക്കി​ടക്കാത്ത തരത്തിൽ പുനർ നിർമ്മിക്കണമെന്നാണ് നാട്ടുകാരുടെ ആവശ്യം.

അടിപ്പാതയിലെ വെള്ളക്കെട്ട് ചൂണ്ടിക്കാട്ടി നിരവധി പരാതികൾ നാട്ടുകാർ അധികൃതർക്ക് നൽകിയിട്ടുണ്ട്. എ.എം. ആരി​ഫ് എം.പി​ക്ക് കഴിഞ്ഞ മാസം ഒന്നി​ന് പ്രദേശവാസികൾ മുഴുവൻ ഒപ്പിട്ട് കത്ത് നൽകിയിരുന്നു. നടപടി നീളുകയാണെങ്കിൽ സമരം സംഘടിപ്പിക്കാനുള്ള തയ്യാറെടുപ്പിലാണ് പ്രദേശവാസികൾ

കരുമാടി മോഹനൻ, പൊതു പ്രവർത്തകൻ