അട്ടിമറിയെന്ന് ആരോപണം

ചേർത്തല : താലൂക്ക് ആശുപത്രിയിൽ സി.ടി സ്‌കാൻ മെഷീൻ പ്രവർത്തി​ക്കാതായി​ട്ട് 25 ദിവസം പിന്നിട്ടിട്ടും തകരാർ പരിഹരിക്കാൻ തയ്യാറാകാത്തതി​നെതി​രെ പ്രതി​ഷേധമുയരുന്നു. മെഷീൻ പ്രവർത്തിപ്പി​ക്കാത്തതിന് പിന്നിൽ അട്ടിമറിയാണെന്ന് ആക്ഷേപമുയരുന്നുണ്ട്.

സ്വകാര്യ സ്ഥാപനങ്ങളെ സഹായിക്കാനുള്ള നീക്കമാണെന്നാണ് ആരോപണം.മെഷീന് തകരാറി​ല്ലെന്നും ഇലക്ട്രിക്കൽ തകരാറുമാത്രമാണുള്ളതെന്നുമാണ് അറിയുന്നത്. ഒരു കോടിയിലേറെ വിലവരുന്ന സ്‌കാനിംഗ് മെഷീൻ താലൂക്ക് ആശുപത്രിയിലെത്തുന്ന സാധാരണക്കാരായ രോഗികൾക്ക് ആശ്വാസമായിരുന്നു. സ്വകാര്യ സ്ഥാപനങ്ങളിൽ 5000 മുതൽ 6000 രൂപ വരെ ചെലവുവരുന്ന സ്‌കാനിംഗിന് 2500 രൂപമാത്രമാണ് ഇവിടെ ചെലവ്. ആശുപത്രി മാനേജിംഗ് കമ്മി​റ്റിക്ക് വലിയ വരുമാനമാർഗവുമായിരുന്നു.

ശരാശരി 10 മുതൽ 15പേരെങ്കിലും ദി​വസേന സ്‌കാനിംഗ് മെഷീനെ ആശ്രയിച്ചിരുന്നു.
ഇലക്ട്രി​ക്കൽ ലൈനി​ലെ എർത്തി​ന്റെ തകരാർ 25 ദിവസം പിന്നിട്ടിട്ടും പരിഹരിക്കാത്തതാണ് അട്ടിമറിയാണെന്ന സംശയമുയർത്തുന്നത്. സ്‌കാനിംഗ് മെഷീന് തുടർച്ചയായി ഉണ്ടാകുന്ന തകരാറുകളെക്കുറിച്ച് സമഗ്ര അന്വേഷണം വേണമെന്ന് ആവശ്യമുയർന്നിട്ടുണ്ട്.രോഗികളിൽ ചിലർ ആരോഗ്യവകുപ്പിനും പരാതി നൽകി.

ഇലക്ട്രിക്കൽ തകരാർ മാത്രമല്ല. മെഷീനും തകരാറുകളുണ്ട്. ഇതുപരിഹരിച്ച് രണ്ടുദിവസത്തിനുള്ളിൽ പ്രവർത്തന സജ്ജമാക്കും.

- ആശുപത്രി സൂപ്രണ്ട്