ആലുവ: തായിക്കാട്ടുകര എസ്.പി.ഡബ്ളിയു ഹൈസ്‌കൂൾ പ്ലാറ്റിനം ജൂബിലിയാഘോഷം 18ന് മന്ത്രി പി.രാജീവ് ഉദ്ഘാടനം ചെയ്യും.

ആലുവയിലെ ആദ്യകാല വ്യവസായശാലയായ സ്റ്റാൻഡേർഡ് പോട്ടറീസ് കമ്പനി ഉടമ നടരാജ മുതലിയാർ ആണ് 1948 ജൂൺ ഏഴിന് മൂന്ന് അദ്ധ്യാപകരും 40 വിദ്യാർത്ഥികളുമായി സ്‌കൂളിന് തുടക്കമിട്ടത്. കമ്പനിയിലെ തൊഴിലാളികളുടെ മക്കൾക്ക് വേണ്ടിയാണ് സ്‌കൂൾ തുടങ്ങിയതെങ്കിലും പ്രദേശത്തെ വിദ്യാഭ്യാസ പിന്നോക്കാവസ്ഥ മനസിലാക്കി നാട്ടുകാർക്ക് കൂടി തുറന്നുകൊടുക്കുകയായിരുന്നു. നിലവിൽ ദേശായി ഗ്രൂപ്പിന്റെ ഉടമസ്ഥതയിലാണ് സ്കൂൾ. പ്ലാറ്റിനം ജൂബിലി സമ്മേളനത്തിൽ അൻവർ സാദത്ത് എം.എൽ.എ അദ്ധ്യക്ഷത വഹിക്കും. ബെന്നി ബഹനാൻ എം.പി മുഖ്യപ്രഭാഷണം നടത്തും. പരിപാടികളുടെ മുന്നോടിയായുള്ള സാംസ്‌കാരിക ഘോഷയാത്ര 17ന് വൈകിട്ട് മൂന്നിന് അമ്പാട്ടുകാവിൽ നിന്നാരംഭിക്കും.
പഞ്ചായത്ത് പ്രസിഡന്റ് രാജി സന്തോഷ്, ഹെഡ്മിസ്ട്രസ്. ഒ.ബി. ലീന, പൂർവ വിദ്യാർത്ഥി അസോസിയേഷൻ പ്രസിഡന്റ് കെ.എ. മായിൻകുട്ടി, സെക്രട്ടറി കെ.എസ്.അനിൽകുമാർ, അബ്ബാസ് മട്ടുമ്മൽ, വാർഡ് അംഗം ലീന ജയൻ എന്നിവർ വാർത്താ സമ്മേളനത്തിൽ പങ്കെടുത്തു.