ഇടുക്കി: ജില്ലാ ഭരണകൂടത്തിന്റെയും ടൂറിസം പ്രൊമോഷൻ കൗൺസിലിന്റെയും ആഭിമുഖ്യത്തിൽ സംഘടിപ്പിക്കുന്ന ഓണം വാരാഘോഷം പരിപാടികൾക്ക് നാളെ ചെറുതോണിയിൽ തുടക്കമാകും. ഓണാഘോഷത്തിന്റെ ഭാഗമായി സംഘടിപ്പിക്കുന്ന സമ്മേളനം വൈകിട്ട് നാലിന് മന്ത്രി റോഷി അഗസ്റ്റിൻ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ജിജി കെ. ഫിലിപ്പ് ചടങ്ങിൽ അദ്ധ്യക്ഷത വഹിക്കും. എം.പി, എം.എൽ.എമാർ, ത്രിതല പഞ്ചായത്ത് പ്രസിഡന്റുമാർ തുടങ്ങിയവരും പങ്കെടുക്കും. രാവിലെ ഒമ്പതിന് ആരംഭിക്കുന്ന വിളംബര ഓട്ട മത്സരത്തോടെയാണ് ആഘോഷ പരിപാടികൾക്ക് തുടക്കമാകുന്നത്. കരിമ്പൻ മുതൽ ചെറുതോണി വരെ നടത്തുന്ന വിളംബര ഓട്ട മത്സരം ജില്ലാ പൊലീസ് മേധാവി വി.യു. കുര്യാക്കോസ് ഫ്ളാഗ് ഓഫ് ചെയ്യും. തുടർന്ന് ജില്ലാ കളക്ടർ ഷീബ ജോർജ് 10ന് ഓണം വാരാഘോഷത്തിന്റെ ഭാഗമായി ചെറുതോണിയിൽ പതാക ഉയർത്തും. തുടർന്ന് തൃശിവ പുലികളി സമിതിയുടെ നേതൃത്വത്തിൽ എൽ.ഐ.സി ഓഫീസ് ജംഷനിൽ നിന്ന് ചെറുതോണിയിലേക്ക് ഘോഷയാത്രയും സംഘടിപ്പിച്ചിട്ടുണ്ട്. ഇതോടൊപ്പം പുലികളിയും മാവേലി, വാമനൻ മത്സരവും ഉണ്ടാകും. രണ്ടാം ദിവസമായ ഏഴിന് രാവിലെ 10ന് ടൗൺഹാളിൽ അത്തപ്പൂക്കള മത്സരം നടക്കും. കുട്ടികൾക്കുള്ള വിവിധ മത്സരങ്ങളും അരങ്ങേറും. ഉച്ചയ്ക്ക് ശേഷം രണ്ടിന് ചെറുതോണി പാപ്പൻസ് ജംഗ്ഷനിൽ തീറ്റ മത്സരവും ടൂ വീലർ സ്ലോ റെയ്‌സ്, സൈക്കിൾ സ്ലോ റെയ്‌സ് തുടങ്ങിയ മത്സരങ്ങളും സംഘടിപ്പിച്ചിട്ടുണ്ട്. മൂന്നാം ദിനമായ വെള്ളിയാഴ്ച വൈകിട്ട് മൂന്ന് മുതൽ അഖില കേരള വടംവലി മത്സരവും 20 വയസിൽ താഴെയുള്ളവർക്കായി ജൂനിയർ വിഭാഗം വടം വലി മത്സരവുമുണ്ടാകും. നാലാം ദിവസമായ ശനിയാഴ്ച കുട്ടികളോടൊപ്പം ഒരു സായാഹ്നം ചെലവഴിക്കുന്നതിനായി ഇടുക്കി ഹിൽ വ്യൂ പാർക്കിൽ സൗജന്യ പ്രവേശനവും ഒരുക്കിയിട്ടുണ്ട്. വൈകിട്ട് നാല് മുതൽ 6 വരെയാണ് സൗജന്യ പ്രവേശനാനുമതി. തുടർന്ന് കലാസാഗർ ചെറതോണി അവതരിപ്പിക്കുന്ന ഗാനമേളയും ഉണ്ടാകും.

ഓണം വാരാഘോഷത്തിന്റെ അവസാന ദിനമായ ഞായർ 11ന് വൈകിട്ട് 4.30 ന് നടക്കുന്ന സമാപന സമ്മേളനം എം.എം. മണി എം.എൽ.എ ഉദ്ഘാടനം ചെയ്യും. ബ്ലോക്ക് പഞ്ചായത്ത് പ്രസിഡന്റ് രാജി ചന്ദ്രൻ സമ്മേളനത്തിൽ അദ്ധ്യക്ഷത വഹിക്കും.