കുമളി: കുമളി ഗ്രാമപഞ്ചായത്തിൽ ഓണം ടൂറിസം വാരാഘോഷത്തിന് സമാപനമായി. ഗ്രാമപഞ്ചായത്തിന്റെയും ടൂറിസം വകുപ്പിന്റെയും നേതൃത്വത്തിൽ കുടുംബശ്രീ, വ്യാപാര വ്യവസായി ഏകോപന സമിതി, ഹോംസ്റ്റേ, റിസോർട്ട് അസോസിയേഷൻ, ക്ലബ്ബുകൾ ഉൾപ്പെടെയുള്ള സന്നദ്ധ സംഘടനകൾ എന്നിവരുമായി ചേർന്നുകൊണ്ട് വിപുലമായാണ് ഇത്തവണ ഓണാഘോഷ പരിപാടികൾ സംഘടിപ്പിച്ചത്. ഹോളിഡേ പരിസരത്ത് നിന്ന് ആരംഭിച്ച വർണാഭമായ വിളംബര റാലിയോടെയാണ് സമാപന ചടങ്ങുകൾക്ക് തുടക്കമായത്. ജില്ലാ പഞ്ചായത്ത് അംഗം രാരിച്ചൻ നീർണാകുന്നേൽ ഫ്‌ളാഗ് ഓഫ് ചെയ്ത റാലിയിൽ കുമളി ബഡ്‌സ് സ്‌കൂളിലെ വിദ്യാർത്ഥികൾ വിവിധ കലാരൂപങ്ങളിൽ അണിനിരന്നു. കൂടാതെ കുട്ടികളുടെ സ്‌കേറ്റിങ്, മഹാബലി, തെയ്യം, മയിലാട്ടം, കളരിപയറ്റ്, വാദ്യമേളങ്ങൾ, നിശ്ചല ദൃശ്യങ്ങൾ, തുടങ്ങിയവ അവതരിപ്പിച്ചു.
കുമളി ബസ് സ്റ്റാൻഡ് പൊതുവേദിയിൽ നടന്ന സമാപന സമ്മേളനം വാഴൂർ സോമൻ എംഎൽഎ ഉദ്ഘാടനം ചെയ്തുഗ്രാമ പഞ്ചായത്ത് പ്രസിഡന്റ് ശാന്തി ഷാജിമോൻ യോഗത്തിൽ അദ്ധ്യക്ഷത വഹിച്ചു. നാഷണൽ കിക്ക് ബോക്‌സിങ് ചാമ്പ്യൻഷിപ്പിൽ ഗോൾഡ് മെഡൽ നേടിയ ഐറിൻ ട്രീസയെ അനുമോദിച്ചു.. യോഗത്തിൽ ആരോഗ്യ വിദ്യാഭ്യാസ സ്റ്റാൻഡിങ് കമ്മറ്റി ചെയർമാൻ കെ എം സിദ്ദിഖ്, വികസനകാര്യ സ്റ്റാൻഡിങ് കമ്മറ്റി ചെയർപേഴ്‌സൻ രജനി ബിജു, ബ്ലോക്ക്, ഗ്രാമ പഞ്ചായത്ത് പ്രതിനിധികൾ, രാഷ്ട്രീയ സാമൂഹ്യ പ്രതിനിധികൾ തുടങ്ങിയവർ പങ്കെടുത്തു.