ഇടുക്കി: സംസ്ഥാന ആർക്കൈവ്‌സ് വകുപ്പ് കുയിലിമലയിൽ പണി കഴിപ്പിച്ച ജില്ലാ ഹെറിറ്റേജ് സെന്ററിന്റെ ഉദ്ഘാടനം 19ന് നടക്കും. രാവിലെ 11 ന് പുരാവസ്തു മന്ത്രി അഹമ്മദ് ദേവർകോവിൽ ഉദ്ഘാടനം നിർവഹിക്കും. മന്ത്രി റോഷി അഗസ്റ്റിൻ അദ്ധ്യക്ഷത വഹിക്കും. ഡീൻ കുര്യാക്കോസ് എം.പി, ജില്ലാ പഞ്ചായത്ത് പ്രസിഡന്റ് ജിജി.കെ. ഫിലിപ്പ് തുടങ്ങിയവർ ചടങ്ങിൽ പങ്കെടുക്കും. പുരാരേഖകളുടെ സംരക്ഷണത്തിനായുള്ള റെക്കാഡ് റൂം, കൺസർവേഷൻ വിഭാഗം, റിസർച്ച് ഹാൾ, ഓഫീസ് ഹാൾ, പ്രദർശന ഹാൾ എന്നിവ ഉൾപ്പെടുത്തിയാണ് ഹെറിറ്റേജ് സെന്റർ ഒരുക്കിയിരിക്കുന്നത്. ഇതിനോടനുബന്ധമായി ഗസ്റ്റ് ഹൗസും പണിതിട്ടുണ്ട്. ജില്ലാ പഞ്ചായത്ത് സൗജന്യമായി നൽകിയ സ്ഥലത്ത് 6300 ചതുരശ്ര അടി വിസ്തൃതിയിലാണ് ഇടുക്കി ജില്ലാ ഹെറിറ്റേജ് കെട്ടിട നിർമാണം പൂർത്തിയാക്കിയത്.