285 വിദ്യാഭ്യാസ സ്ഥാപനങ്ങളിൽ ആന്റി നാർക്കോട്ടിക് ക്ലബ് രൂപീകരിച്ചു

തൊടുപുഴ: വിദ്യാർത്ഥികൾക്കിടയിലെ മയക്കുമരുന്ന് ഉപയോഗവും വിപണനവും തടയുക എന്ന ലക്ഷ്യത്തോടെ പൊലീസ് നടപ്പിലാക്കുന്ന 'യോദ്ധാവ്' പദ്ധതി ജില്ലയിൽ ഏറെ മുന്നേറ്റ പാതയിൽ

പദ്ധതിയുടെ ഭാഗമായി ജില്ലയിൽ ഇതുവരെ നിരവധി പരിപാടികളാണ് സംഘടിപ്പിച്ചത്. വിദ്യാർത്ഥികൾക്കിടയിലെ ലഹരി മരുന്നുകളുടെ ഉപയോഗത്തിനെതിരെ ആരംഭിക്കുന്ന ഉണർവ്വ് ക്യാമ്പയിന് മുന്നോടിയായി ആന്റി നാർക്കോട്ടിക് ക്ലബ് രൂപീകരിക്കുന്നതിനായി ജില്ലയിലെ എല്ലാ ഹൈസ്‌കൂൾ, ഹയർ സെക്കണ്ടറി, കോളേജ് കളിലും ബന്ധപ്പെട്ട വകുപ്പുകൾ മുഖേന വിവരശേഖരണം നടത്തുകയും ജില്ലയിലെ 224 സ്‌കൂളുകളിലും 61 കോളേജുകളിലുമായി ആകെ 285 വിദ്യാഭ്യാസ സ്ഥാപനങ്ങളിൽ ആന്റി നാർക്കോട്ടിക് ക്ലബ് രൂപീകരിക്കുകയും ചെയ്തു.
യോദ്ധാവ് പദ്ധതിയുമായി ബന്ധപ്പെട്ട് ജില്ലയിൽ ഇതുവരെ 323 ബോധവത്ക്കരണ ക്ലാസുകളും, 475 റെയ്ഡുകളും നടത്തി. ലഹരി വിരുദ്ധ പ്രമോഷണൽ വീഡിയോകൾ തയ്യാറാക്കി വിവിധ സോഷ്യൽ മീഡിയ പ്ലാറ്റ്‌ഫോമുകളിൽ യോദ്ധാവ് പദ്ധതിയെക്കുറിച്ചും ലഹരി വിരുദ്ധ പ്രവർത്തനങ്ങളെക്കുറിച്ചും ബോധവത്ക്കരണം നടത്തുന്നു. കൂടാതെ യോദ്ധാവ് പദ്ധതിയുമായി ബന്ധപ്പെട്ട് ജില്ലയിൽ പ്രദേശവാസികളെയും വിദ്യാർത്ഥികളെയും, സ്റ്റുഡന്റ് പൊലീസ് കേഡറ്റുകളെയും ഉൾപ്പെടുത്തി ലഹരി വിരുദ്ധ ബോധവത്ക്കരണ റാലികളും, വടംവലി, ഫ്‌ളാഷ് മോബ്, പോസ്റ്റർ പ്രചാരണം, ബ്രോഷർ വിതരണം, ഷോർട് ഫിലിം, ആന്റി നാർക്കോട്ടിക് പ്ലഡ്ജ് മുതലായവയും സംഘടിപ്പിച്ചു.
യോദ്ധാവ് പദ്ധതിയുടെ ഉദ്ദേശലക്ഷ്യങ്ങളെക്കുറിച്ചും പ്രാധാന്യത്തെക്കുറിച്ചും വിശദീകരിക്കുന്നതിനും ജില്ലയിലെ യോദ്ധാവ് പദ്ധതിയുടെ പ്രവർത്തനങ്ങളെക്കുറിച്ച് വിലയിരുത്തുന്നതിനും ആവശ്യമായ നിർദ്ദേശങ്ങൾ നൽകുന്നതിനുമായി ഇടുക്കി നാർക്കോട്ടിക് സെൽ ഡിവൈ. എസ്. പി മാത്യു ജോർജിന്റെ നേതൃത്വത്തിൽ ജില്ലയിലെ എല്ലാ പൊലീസ് സ്റ്റേഷനുകളിലെയും ആന്റി നാർക്കോട്ടിക് കോർഡിനേറ്റർമാരുടെ മീറ്റിങ് നടത്തി.
പദ്ധതിയുടെ ഭാഗമായി കുട്ടികളിൽ ലഹരി എത്തുന്നുണ്ടോ എന്ന് നിരീക്ഷിക്കുന്നതിനായി എല്ലാ സ്‌കൂളിലും കോളേജുകളിലും അദ്ധ്യാപകരെ ചുമതലപ്പെടുത്തി. തിരഞ്ഞെടുക്കപ്പെടുന്ന അദ്ധ്യാപകർക്ക് സബ് ഡിവിഷൻ തലത്തിൽ പരിശീലനം സംഘടിപ്പിച്ചു. യോദ്ധാവ് പദ്ധതിയുമായി ബന്ധപ്പെട്ട് പൊതുജനങ്ങൾക്ക് അവബോധം നൽകുന്നതിനായി ജില്ലാതലത്തിൽ ജനമൈത്രി ബീറ്റ് ഓഫീസർമാർക്കും ജില്ലയിലെ എസ്. ഐ റാങ്ക് മുതലുള്ള എല്ലാ പൊലീസ് ഉദ്യോഗസ്ഥർക്കും എൻ. ഡി. പി. എസ് കേസുകൾ സംബന്ധിച്ചും പ്രത്യേകം പരിശീലനവും നൽകി.

വിവിധ വകുപ്പുകളെ

സംയോജിപ്പിച്ചു

വർദ്ധിച്ചുവരുന്ന മദ്യംമയക്കുമരുന്ന് ഉപയോഗം, വിൽപ്പന, കടത്ത് എന്നിവയ്ക്കെതിരെ ജാഗ്രത പുലർത്തേണ്ട ആവശ്യകത മനസിലാക്കിയാണ് സംസ്ഥാന പൊലീസ് പദ്ധതി ആവിഷ്‌കരിച്ചത്. വിദ്യാഭ്യാസം, ആരോഗ്യം, എക്‌സൈസ്, സാമൂഹ്യ നീതി, തദ്ദേശ സ്വയംഭരണം എന്നീ വകുപ്പുകളുടെ സഹായത്തോടെ നടപ്പിലാക്കുന്ന പദ്ധതിയിൽ സന്നദ്ധ സംഘടനകളെയും സാമൂഹ്യ പ്രവർത്തകരെയും ഉൾപ്പെടുത്തി വിപുലമായാണ് നടപ്പിലാക്കുന്നത്.