കുമളി: ലഹരി ഉപയോഗത്തിനെതിരെ എക്‌സൈസ് വകുപ്പ് നടപ്പിലാക്കുന്ന വിമുക്തി പദ്ധതിയുടെ ഭാഗമായി കുമളിയിൽ പഞ്ചായത്ത് തല, വാർഡ് തല ജനജാഗ്രത സമിതികൾ രൂപീകരിച്ചു.ഇതോടനുബന്ധിച്ച് പഞ്ചായത്ത് കോൺഫറൻസ് ഹാളിൽ എക്‌സൈസ് ഉദ്യോഗസ്ഥരുടെ നേതൃത്വത്തിൽ ലഹരി വിപത്തിനെക്കുറിച്ച് ചർച്ചയും സംഘടിപ്പിച്ചു. ലഹരി ഉപയോഗമോ വിതരണമോ ശ്രദ്ധയിൽപ്പെട്ടാൽ ചെയ്യേണ്ട കാര്യങ്ങൾ സംബന്ധിച്ച് ഉദ്യോഗസ്ഥർ ജനപ്രതിനിധികൾക്ക് വിശദീകരിച്ചു നൽകി. എക്‌സൈസ് കൂടുതൽ ഊർജിതമായി പ്രവർത്തിക്കണമെന്ന് ജനപ്രതിനിധികളും ആവശ്യപ്പെട്ടു. ലഹരി ഉപയോഗം തടയാൻ വിപുലമായ പദ്ധതികളാണ് പഞ്ചായത്ത് തലത്തിൽ നടപ്പിലാക്കുന്നത്.

യോഗത്തിൽ ഗ്രാമ പഞ്ചായത്ത് പ്രസിഡന്റ് ശാന്തി ഷാജിമോൻ, വൈസ് പ്രസിഡന്റ് വി. കെ. ബാബുക്കുട്ടി, സെക്രട്ടറി സെൻകുമാർ, എക്‌സൈസ് പ്രിവന്റ്രീവ് ഓഫിസർ ബെന്നി ജോസഫ്, വനിതാ സി.ഐ. ശശികല, ഗ്രാമപഞ്ചായത്ത് പ്രതിനിധികൾ തുടങ്ങിയവർ പങ്കെടുത്തു.