ഇടുക്കി: പട്ടികജാതി വികസന വകുപ്പിന്റെ മെഡിക്കൽ, എഞ്ചിനീയറിംഗ് എൻട്രൻസ് പരിശീലനപദ്ധതി പ്രകാരം 2021 ൽ പ്ളസ് ടു പാസായ പട്ടികജാതി വിദ്യാർത്ഥികളിൽ നിന്നും എഞ്ചിനീയറിംഗ് പ്രവേശന പരീക്ഷയ്ക്ക് കോച്ചിംഗ് നൽകുന്നതിന് അപേക്ഷ ക്ഷണിച്ചു. കെമിസ്ട്രി, ഫിസിക്‌സ്, ബയോളജി, കണക്ക്, ഇംഗ്‌ളീഷ് എന്നീ വിഷയങ്ങളിൽ ബി പ്ലസിൽ കുറയാത്ത ഗ്രേഡ് വാങ്ങി പാസായവരും വാർഷിക വരുമാനം ആറ് ലക്ഷം രൂപയിൽ കവിയാത്തവരുമായ വിദ്യാർത്ഥികൾക്ക് അപേക്ഷിക്കാം. പട്ടികജാതി വികസന വകുപ്പ് ജില്ലയിൽ അംഗീകരിച്ചിട്ടുള്ള സ്ഥാപനങ്ങളിൽ എഞ്ചിനിയറിംഗ് എൻട്രൻസ് പരിശീലനത്തിന് പ്രവേശിക്കുന്ന വിദ്യാർത്ഥികൾ നിശ്ചിത മാതൃകയിലുള്ള അപേക്ഷ, വിദ്യാർത്ഥിയുടെ ജാതി സർട്ടിഫിക്കറ്റ്, രക്ഷകർത്താവിന്റ കുടുംബ വാർഷിക വരുമാനം, എസ്.എസ്.എൽ.സി, പ്ളസ്ടുസർട്ടിഫിക്കറ്റുകളുടെ സ്വയം സാക്ഷ്യപ്പെടുത്തിയ പകർപ്പ്, പരിശീലന സ്ഥാപനത്തിൽ ചേർന്ന സർട്ടിഫിക്കറ്റ്, ഫീസ് അടച്ച തെളിവ്, വിദ്യാർത്ഥിയുടെ ബാങ്ക് അക്കൗണ്ടിന്റെ കോപ്പി, ആധാർ കോപ്പി, ബന്ധപ്പെട്ട ഫോൺ നമ്പർ എന്നിവ സഹിതം ഒക്ടോബർ 15 നകം കുയിലിമല സിവിൽ സ്റ്റേഷനിൽ പ്രവർത്തിക്കുന്ന ജില്ലാ പട്ടികജാതി വികസന ഓഫീസിൽ അപേക്ഷ സമർപ്പിക്കണം. കൂടുതൽ വിവരങ്ങൾ ജില്ല, ബ്ലോക്ക് പട്ടികജാതി വികസന ഓഫീസുകളിൽ നിന്നും ലഭിക്കും. ഫോൺ: 04862 296297, 8547630073.