പീരുമേട്: നായ കുറുകെ ചാടിയതിനെ തുടർന്ന് ഓട്ടോ റിക്ഷ നിയന്ത്രണംവിട്ട് എതിരെ വന്ന കാറിലിടിച്ച് മറിഞ്ഞ് ഡ്രൈവർക്ക് പരിക്കേറ്റു. ഓട്ടോ ഡ്രൈവർ ജ്ഞാന ദാസ് ( 65 )നെ ഗുരുതര പരിക്കുകളോടെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. പീരുമേട് മോട്ടോർ ഡ്രൈവിംഗ് ടെസ്റ്റിംഗ് കേന്ദ്രത്തിന് മുമ്പിൽ ഇന്നലെ രാവിലെ 8 മണിയോടെയായിരുന്നു അപകടം. പീരുമേട് താലൂക്ക് ആശുപത്രിയിൽ പ്രഭാത ഭക്ഷണം വിതരണം ചെയ്യുന്ന സംഘടനയിലെ അംഗമാണ് ജ്ഞാന ദാസ്. പതിവു പോലെ പ്രഭാത ഭക്ഷണവുമായി താലൂക്ക് ആശുപത്രിയിലേക്ക് വരുകയായിരുന്ന ഓട്ടോ റിക്ഷ റോഡ് മുറിച്ചു കടന്ന നായ്ക്കളെ ഒഴിവാക്കാൻ വെട്ടിച്ചപ്പോൾ എതിരെ വന്ന കാറിൽ ഇടിക്കുകയായിരുന്നു. കോട്ടയം ആശുപത്രിയിലേക്ക് പോകുകയായിരുന്ന കുമളി സ്വദേശികൾ സഞ്ചരിച്ച കാറിൽ ഓട്ടോ ഇടിച്ച് മറിയുകയായിരുന്നു. തുടർന്ന് പരിക്കേറ്റയാളെ പീരുമേട് താലൂക്ക് ആശുപത്രിയിൽ പ്രാഥമിക ചികിത്സക്ക് ശേഷം കോട്ടയം മെഡിക്കൽ കോളജിലും പ്രവേശിപ്പിച്ചു.