കോട്ടയം: മൃഗസംരക്ഷണവകുപ്പ് സംസ്ഥാന വ്യാപകമായി നടത്തുന്ന പേവിഷബാധ നിർമ്മാർജന പദ്ധതിയുടെ ഭാഗമായി ജില്ലയിൽ പേവിഷബാധയ്ക്കെതിരെയുള്ള പ്രതിരോധ കുത്തിവെയ്പ്പ് നിർബന്ധമാക്കുന്നു. ജില്ലയിലെ മുഴുവൻ വളർത്തുനായ്ക്കൾക്കും പൂച്ചകൾക്കും തങ്ങളുടെ പഞ്ചായത്തിലെ/മുനിസിപ്പാലിറ്റിയിലെ മൃഗാശുപത്രിയുമായി ബന്ധപ്പെട്ട് ഉടമസ്ഥർ 15ന് മുമ്പായി പ്രതിരോധ കുത്തിവെയ്പ്പെടുപ്പിക്കണം. വാക്സിനേഷൻ സർട്ടിഫിക്കറ്റ് ഹാജരാക്കി സ്വന്തം പഞ്ചായത്ത്/മുനിസിപ്പാലിറ്റിയിൽ നിന്നും വളർത്ത് നായ്ക്കൾക്ക് ലൈസൻസ് എടുക്കണം. പേവിഷബാധാനിർമ്മാർജ്ജന പദ്ധതിയുടെ ഭാഗമായി ജില്ലയിലെ തെരുവ് നായ്ക്കളെ പിടികൂടുന്നതിനായി പരിശീലനം ലഭിച്ച നായ്പിടുത്തക്കാരും, സന്നദ്ധസംഘടനാപ്രവർത്തകരും തൊട്ടടുത്തുള്ള മൃഗാശുപത്രിയുമായി ബന്ധപ്പെടണമെന്ന് ജില്ലാ മൃഗസംരക്ഷണ ഓഫീസർ ഡോ.ഷാജി പണിക്കശേരി അറിയിച്ചു.