കോട്ടയം : ന​ഗരത്തിലെ മാലിന്യപ്രശ്നത്തിന് ശാശ്വത പരിഹാരം എന്ന് ? ഈ ചോദ്യം ഉയരാൻ തുടങ്ങിയിട്ട് വർഷങ്ങളായി. എന്നിട്ടും ഇതിനുത്തരവാദിത്തപ്പെട്ട ന​ഗരസഭയുടെ ഭാ​ഗത്ത് നിന്നും നടപടികളില്ല. പൊതുസ്ഥലത്ത് കുന്നുകൂടിക്കിടക്കുന്ന മാലിന്യങ്ങൾ കാരണം തെരുവ് നായ്ക്കൾ പെരുകി. നായശല്യം പേടിച്ച് ജനത്തിന് വഴി നടക്കാൻ പോലും സാധിക്കുന്നില്ല. മാംസമാലിന്യങ്ങൾ അടക്കമാണ് നിരത്തുകളിൽ നിറയുന്നത്. ഒരു സ്ഥലത്ത് നിന്ന് വാരി മറ്റൊരു സ്ഥലത്ത് തള്ളുന്നതാണ് ​ന​ഗരത്തിലെ മാലിന്യസംസ്കരണം. കഞ്ഞിക്കുഴി പഴയ മാർക്കറ്റിലും കോടിമത പച്ചക്കറി മാർക്കറ്റിന് സമീപവുമാണ് ന​ഗരത്തിൽ നിന്ന് ശേഖരിക്കുന്ന മാലിന്യം തള്ളുന്നത്. മാലിന്യം വേർതിരിച്ചുള്ള സംസ്കരണം ഇവിടെ നടക്കുന്നില്ല. കോടികൾ മുടക്കി വൻ പദ്ധതികൾ പ്രഖ്യാപിക്കുമ്പോഴും മാലിന്യപ്രശ്നം രൂക്ഷമായിരിക്കുകയാണ്.

കോടിമതയിലെ മാലിന്യമല

കോടിമത പച്ചക്കറി മാർക്കറ്റിന് സമീപത്തെ മാലിന്യം ഓരോ ദിവസവും കൂടി വരികയാണ്. പ്ലാ​സ്റ്റിക്ക് മാലിന്യങ്ങളാണ് ഏറെയും. ആരും തിരിഞ്ഞുനോക്കാതായതോടെ ഇത് കാടുകയറി. തരംതിരിക്കലോ മാലിന്യനീക്കമോ നിലച്ചിട്ട് രണ്ട് മാസത്തിലേറെയായെന്ന് മാർക്കറ്റിലെ വ്യാപാരികൾ പറയുന്നു. ഇപ്പോൾ ഇവിടെ റോഡരികിൽ വരെ മാലിന്യമായി. പ്ലാ​സ്റ്റിക് മാലിന്യം വേർതിരിച്ച് സംസ്കരിക്കുന്ന പദ്ധതിയും പരാജയമായി.

തുരുമ്പെടുത്ത് വാഹനങ്ങൾ

നേരത്തെ മാലിന്യങ്ങൾ ശേഖരിച്ച് സംസ്കരിക്കുന്നതിനും വടവാതൂർ ഡമ്പിംഗ് യാർഡിൽ തള്ളുന്നതിനുമായി ഉപയോ​ഗിച്ചിരുന്ന കോടികൾ വില വരുന്ന വാഹനങ്ങൾ കഞ്ഞിക്കുഴിയിലെ മാർക്കറ്റിനുള്ളിൽ തുരുമ്പെടുത്ത് നശിക്കുകയാണ്. ന​ഗരസഭയുടെ അജൈവ മാലിന്യ സംസ്കരണ കേന്ദ്രത്തിലും (പ്ലാ​സ്റ്റിക് ഷ്രെഡിം​ഗ് യൂണിറ്റ്) സ്ഥിതി സമാനമാണ്. പഴയ പൊലീസ് ​സ്റ്റേഷൻ മൈതാനത്തിന് സമീപം, കാരാപ്പുഴ റോഡ്, ശ്രീനിവാസ അയ്യർ റോഡ്, പബ്ലിക് ലൈബ്രറിയ്ക്ക് സമീപം, പോപ്പ് മൈതാനം, പുത്തനങ്ങാടി തുടങ്ങിയവ മാലിന്യ പോയി​ന്റുകളാണ്.

ന​ഗരസഭയുടെ വിശദീകരണം

അജൈവ മാലിന്യങ്ങൾ ശേഖരിക്കാനുള്ള ചുമതല ക്ലീൻ കേരള കമ്പനിയ്ക്കായിരുന്നു. ഇവരുടെ പ്രവർത്തനം മന്ദീഭവിച്ചതോടെയാണ് മാലിന്യനീക്കം നിലച്ചത്. ശുചിത്വ മിഷൻ അം​​ഗീകാരമുള്ള ഏജൻസികളെ അജൈവ മാലിന്യ ശേഖരണത്തിനായി ക്ഷണിച്ചിരുന്നു. സന്നദ്ധതയറിച്ച മൂന്നു കമ്പനികളിൽ നിന്ന് ഒരാളെ ആരോ​ഗ്യകാര്യ സമിതി തിരഞ്ഞെടുത്തു. ഇനി കൗൺസിൽ യോ​ഗത്തി​ന്റെ അം​ഗീകാരം വേണം.