കോട്ടയം : വിവേചനങ്ങളില്ലാത്ത വികസനമാണ് രാജ്യത്ത് കേന്ദ്ര സർക്കാർ നടപ്പാക്കുന്നതെന്ന് ബി.ജെപി ദേശീയ അദ്ധ്യക്ഷൻ ജെ.പി.നദ്ദ പറഞ്ഞു. കേരളത്തിൽ ഭവന രഹിതരായ രണ്ടു ലക്ഷം പേർക്ക് വീട് നൽകുകയാണ് ലക്ഷ്യം. നാട്ടിലെ ഏറ്റവും പാവപ്പെട്ടവരിലേക്കാണ് മോദി സർക്കാരിന്റെ പദ്ധതികൾ എത്തുന്നതെന്നും കോട്ടയം കെ.പി.എസ് മേനോൻ ഹാളിൽ നടന്ന പ്രധാനമന്ത്രി ആവാസ് യോജന പദ്ധതിയുടെ ഗുണഭോക്തൃ സംഗമം ഉദ്ഘാടനം ചെയ്ത് അദ്ദേഹം പറഞ്ഞു. കേരള മുഖ്യമന്ത്രിയുടെ ഓഫീസ് പോലും അഴിമതിയിൽ നിന്ന് മുക്തമല്ല. സ്വർണക്കടത്ത് കേസ് അഴിമതിയുടെ ഉദാഹരണമാണ്. കേരളം അഴിമതി മുക്തമാകണമെങ്കിൽ ബി.ജെ.പിക്കൊപ്പം നിൽക്കണമെന്നും അദേഹം ആഹ്വാനം ചെയ്തു. കേരള ബി.ജെ.പി ഘടകം പ്രഭാരി പ്രകാശ് ജാവഡേക്കർ, സംസ്ഥാന അദ്ധ്യക്ഷൻ കെ.സുരേന്ദ്രൻ, ജില്ലാ പ്രസിഡന്റ് ലിജിൻ ലാൽ, അൽഫോൺസ് കണ്ണന്താനം, കുമ്മനം രാജശഖരൻ തുടങ്ങിയവർ പങ്കെടുത്തു.