മുംബയ്: ബോളിവുഡ് നടനും നിരൂപകനുമായ കമാല്‍ ആര്‍ ഖാന്‍ അറസ്റ്റില്‍. നടിയെ ലൈംഗിക ബന്ധത്തിന് പ്രേരിപ്പിച്ചുവെന്ന കേസിലാണ് താരം പിടിയിലായത്. യുവനടിയും മോഡലും ഫിറ്റ്‌നസ് പരിശീലകയുമായ യുവതിയുടെ പരാതിയിലാണ് മുംബയ് വെര്‍സോവ പൊലീസ് കെ.ആര്‍.കെ എന്നറിയപ്പെടുന്ന കമാല്‍ ആര്‍ ഖാനെ അറസ്റ്റ് ചെയ്‌തത്.
2019 ലെ സംഭവത്തിൽ 2021 ലാണ് കെ.ആര്‍.കെയ്‌ക്കെതിരെ യുവതി പരാതി നല്‍കുന്നതും കേസ് രജിസ്റ്റര്‍ ചെയ്തതും. ഇതിന് പുറമെ സമൂഹമാദ്ധ്യമങ്ങളിലൂടെ അപകീര്‍ത്തികരമായ പരാമര്‍ശങ്ങള്‍ നടത്തിയ മറ്റൊരു കേസില്‍ 14 ദിവസത്തേക്ക് താരത്തെ ജുഡീഷ്യല്‍ കസ്റ്റഡിയില്‍ വിട്ടിരിക്കുകയാണ്. 2020ൽ ഇർഫാൻ ഖാൻ, ഋഷി കപൂർ എന്നിവർക്കെതിരെ നടത്തിയ വിദ്വേഷ പരാമർശങ്ങളാണ് കേസിന് ആസ്‌പദം.
യുവസേന അംഗം രാഹുൽ കനാൽ ആണ് നടനെതിരെ മലാഡ് പൊലീസ് സ്‌റ്റേഷനിൽ പരാതി നൽകിയത്. 'എന്റെ പരാതിയിൽ കമൽ ആർ ഖാനെ അറസ്റ്റ് ചെയ്തു. മുംബയ് പൊലീസിന്റെ ഈ നടപടിയെ ഞാൻ സ്വാഗതം ചെയ്യുന്നു. അയാൾ സോഷ്യൽ മീഡിയയിൽ അപകീർത്തികരമായ പരാമർശങ്ങൾ നടത്തുകയും മോശം ഭാഷ ഉപയോഗിക്കുകയും ചെയ്യുന്നു. ഇത്തരത്തിലുള്ള പെരുമാറ്റം സമൂഹത്തിൽ അംഗീകരിക്കാനാവില്ല. ഇയാളെ അറസ്റ്റ് ചെയ്‌തതിലൂടെ ഇത്തരക്കാർക്കെതിരായ ശക്തമായ സന്ദേശമാണ് മുംബയ് പൊലീസ് നൽകുന്നത്'- രാഹുൽ കനാൽ പറഞ്ഞു. വിവാദ ട്വീറ്റുകളിലൂടെ പലട്ടം ശ്രദ്ധ നേടിയിട്ടുള്ള താരമാണ് കമാൽ ആർ ഖാൻ.