കൊച്ചി: ഡിജിറ്റൽ സാങ്കേതിക രംഗത്ത് മികച്ച മുന്നേറ്റം കാഴ്ചവച്ച ഫെഡറൽ ബാങ്ക് നിർമിതബുദ്ധി (എ.ഐ) അടിസ്ഥാനമാക്കിയുള്ള നവീന ആശയങ്ങൾ അവതരിപ്പിക്കുന്ന സംരംഭങ്ങൾക്ക് സഹായവുമായെത്തുന്നു. ആദ്യ ഘട്ടത്തിൽ റോബോട്ടിക്‌സിൽ പുതിയ ഉത്പന്നങ്ങൾ വികസിപ്പിക്കുന്ന അസിമോവ് റോബോട്ടിക്‌സ് എന്ന സംരംഭത്തിനാണ് വായ്പ അനുവദിച്ചിരിക്കുന്നത്. വായ്പ അനുവദിച്ച ഉത്തരവ് അസിമോവ് വികസിപ്പിച്ച സായബോട്ട് എന്ന റോബൊട്ട് ഫെഡറൽ ബാങ്ക് എം.ഡിയും സി.ഇ.ഒയുമായ ശ്യാം ശ്രീനിവാസനിൽ നിന്നു ഏറ്റുവാങ്ങി. ആരോഗ്യം, റീട്ടെയ്ൽ, ഹോസ്പിറ്റാലിറ്റി തുടങ്ങിയ മേഖലകളിൽ നിരവധി ദൈനംദിന ജോലികൾ ചെയ്യാൻ ശേഷിയുള്ള സായബോട്ട് അതിന്റെ കഴിവുകൾ പ്രദർശിപ്പിച്ചു.
സാമൂഹിക പ്രതിബദ്ധതയും മികച്ച ഡിജിറ്റൽ ശേഷികളുമുള്ള ഒരു സ്ഥാപനം എന്ന നിലയിൽ ഫെഡറൽ ബാങ്ക് പുതിയ സംരംഭകരെ അവരുടെ ഏറ്റവും മികച്ച ആശയങ്ങൾ യാഥാർത്ഥ്യമാക്കുന്നതിന് വലിയ പിന്തുണയാണ് നൽകി വരുന്നതെന്നും നിരവധി സംരംഭങ്ങളെ ബാങ്ക് ഇങ്ങനെ പിന്തുണച്ചിട്ടുണ്ടെന്നും ബാങ്ക് എം.ഡിയും സി.ഇ.ഒയുമായ ശ്യാം ശ്രീനിവാസൻ പറഞ്ഞു.
ഫെഡറൽ ബാങ്ക് സീനിയർ വൈസ് പ്രസിഡന്റും സോണൽ മേധാവിയുമായ കുര്യാക്കോസ് കോണിൽ, ചീഫ് മാർക്കറ്റിംഗ് ഓഫീസർ എം. വി. എസ് മൂർത്തി, അസിമോവ് പ്രതിനിധികൾ, ഉദ്യോഗസ്ഥർ തുടങ്ങിയവർ വാർത്താ സമ്മേളനത്തിൽ പങ്കെടുത്തു.