ന്യൂഡൽഹി: എലിസബത്ത് രാജ്ഞിയുടെ വിയോഗത്തിൽ ഇന്ത്യയിൽ ഇന്ന് ഔദ്യോഗിക ദുഃഖാചരണം.രാജ്ഞിയോടുള്ള ആദരസൂചകമായി ദേശീയ പതാക പകുതി താഴ്ത്തിക്കെട്ടും. രാഷ്ട്രപതി ഭവനിലും ചെങ്കോട്ടയിലും ദേശീയപതാക പകുതി താഴ്ത്തിക്കെട്ടി. ദുഃഖാചരണത്തിന്റെ ഭാഗമായി എല്ലാ സർക്കാർ ആഘോഷ പരിപാടികളും ഒഴിവാക്കി. ഒരു ദിവസത്തെ ദുഃഖാചാരമാണ് ആഹ്വാനം ചെയ്തിരിക്കുന്നത്.

എലിസബത്ത് രാജ്ഞിയുടെ മരണത്തിൽ പ്രധാനമന്ത്രി നരേന്ദ്രമോദി നേരിട്ട് അനുശോചനം അറിയിച്ചു. ബ്രിട്ടീഷ് പ്രധാനമന്ത്രി ലിസ് ട്രസിനെ ഫോണിൽ വിളിച്ചാണ് മോദി അനുശോചനം അറിയിച്ചത്. ബ്രിട്ടീഷ് ജനതയുടെ ദുഃഖത്തിൽ ഇന്ത്യയും പങ്കുചേരുന്നുവെന്ന സന്ദേശമാണ് മോദി കൈമാറിയത്.

അതേസമയം, എലിസബത്ത് രാജ്ഞിയുടെ മൃതദേഹം ഇന്ന് ബ്രിട്ടണിൽ എത്തിക്കും. സ്കോട്ട്ലാൻഡിലെ ബാൽമോറൽ പാലസിൽ നിന്നും റോഡ് മാർഗമാണ് എഡിൻബർഗിലെത്തിക്കുന്നത്. ഹോളിറൂഡ് ഹൗസിലാണ് മൃതദേഹം സൂക്ഷിക്കുക. മൃതദേഹം റോഡ് മാർഗം കൊണ്ടു പോകുമ്പോൾ പൊതു ജനങ്ങൾക്ക് അന്ത്യോപചാരം അർപ്പിക്കാൻ സൗകര്യം ഒരുക്കിയിട്ടുണ്ട്. എലിസബത്ത് രാജ്ഞിയുടെ മകളായ ആൻ രാജകുമാരി മൃതദേഹത്തെ അനുഗമിക്കും. ഈ മാസം പത്തൊൻപതിന് വെസ്റ്റ് മിൻസ്റ്റർ ആബേയിൽ വച്ചാണ് സംസ്കാരം നടക്കുന്നത്.