ന്യൂഡഅഹി: അകാലത്തിൽ അന്തരിച്ച ഓസ്‌ട്രേലിയൻ സ്പിന്‍ ഇതിഹാസം ഷെയ്ൻ വോണിന്റെ ജന്മദിനത്തിൽ അദ്ദേഹത്തെ ഓർത്ത് വികാരനിർഭരമായ സോഷ്യൽ മീഡിയ കുറിപ്പ് പങ്കുവെച്ച് സച്ചിൻ ടെൻഡുൽക്കർ. കളിക്കളത്തിൽ കടുത്ത എതിരാളികളും കളത്തിനു പുറത്ത് അടുത്ത ആത്മബന്ധം സൂക്ഷിച്ചവരുമായിരുന്നു ഇരുവരും.
' വോണി, ജന്മദിനത്തിൽ നിന്ന് ഓർക്കുന്നു. നീ പോയത് വളരെ നേരത്തെയായി. നിന്നോടൊപ്പം അവിസ്മരണീയമായ ഒരുപാട് നിമിഷങ്ങളുണ്ടായിരുന്നു. അവ എന്നെന്നും ഞാൻ ഓർക്കും സുഹൃത്തേ.' - സച്ചിൻ ട്വിറ്ററിൽ കുറിച്ചു.
ഒരു കാലത്ത് ഇന്ത്യ - ഓസ്‌ട്രേലിയ പോരാട്ടങ്ങൾ സച്ചിനും വോണും തമ്മിലുള്ള പോരാട്ടങ്ങൾ എന്ന തലത്തിലേക്ക് വളർന്നിരുന്നു. 1998-ൽ ഓസ്‌ട്രേലിയയുടെ ഇന്ത്യൻ പര്യടനത്തിനിടെ പിച്ചിലെ ഇരുവരുടെയും പോരാട്ടങ്ങൾ ശ്രദ്ധേയമായിരുന്നു.
ഈ വർഷം മാർച്ച് നാലിന് തായ്‌ലാൻഡിലെ വിശ്രമവസതിയിൽ വെച്ചായിരുന്നു 52-കാരനായിരുന്ന വോണിന്റെ അന്ത്യം. ഹൃദയാഘാതമായിരുന്നു മരണ കാരണം. താരത്തെ അദ്ദേഹം താമസിച്ചിരുന്ന തായ്‌ലൻഡിലെ കോ സാമുയിയിലെ വീട്ടിൽ അബോധാവസ്ഥയിൽ കണ്ടെത്തുകയായിരുന്നു. മെഡിക്കൽ സ്റ്റാഫ് പ്രഥമ ശുശ്രൂഷ നല്‍കിയെങ്കിലും ജീവൻ രക്ഷിക്കാനായില്ല. വോണിന്റേത് സ്വാഭാവിക മരണമാണെന്നായിരുന്നു പോസ്റ്റുമോർട്ടം റിപ്പോർട്ട്. വോണിന്റെ മരണത്തിൽ ദുരൂഹതകളൊന്നും ഇല്ലെന്നും തായ്ലാൻഡ് പോലീസ് വ്യക്തമാക്കിയിരുന്നു.