തിരുവനന്തപുരം: സിൽവർ ലൈൻ, നിലമ്പൂർ നഞ്ചൻകോട് പാത ഉൾപ്പെടെ റെയിൽവേയുമായി ബന്ധപ്പെട്ട വിഷയങ്ങൾ ചർച്ച ചെയ്യാൻ മുഖ്യമന്ത്രി പിണറായി വിജയൻ കർണാടക മുഖ്യമന്ത്രി ബസവരാജ് ബൊമ്മയുമായി കൂടിക്കാഴ്ച നടത്തും. നാളെ രാവിലെ 9.30ന് ബെംഗളുരുവിലാണ് കൂടിക്കാഴ്ച നിശ്ചയിച്ചിരിക്കുന്നത്. സിൽവർലൈൻ പാത മംഗളുരു വരെ നീട്ടുന്നത് ഉൾപ്പെടെ ഇരുവരും ചർച്ച ചെയ്യുമെന്നാണ് വിവരം. ഇത് കൂടാതെ ബാഗെപ്പള്ളിയിൽ സി.പി.എം സംഘടിപ്പിക്കുന്ന പൊതുയോഗത്തിലും ബഹുജന റാലിയിലും പിണറായി വിജയൻ പങ്കെടുക്കും.

തിരുവനന്തപുരത്ത് നടന്ന ദക്ഷിണേന്ത്യൻ കൗൺസിൽ യോഗത്തിൽ സിൽവർ ലൈൻ മംഗളുരു വരെ നീട്ടാൻ കേരളം കർണാടകയുടെ പിന്തുണ തേടിയിരുന്നു. മുഖ്യമന്ത്രിമാർ തമ്മിൽ സിൽവർലൈൻ വിഷയത്തിൽ ചർച്ച നടത്തുന്നതിന് കൗൺസിലിൽ ധാരണയായിരുന്നു. അതിന്റെ കൂടി അടിസ്ഥാനത്തിലാണ് നാളത്തെ ചർച്ച.

കേന്ദ്രം അനുമതി നൽകിയാൽ പദ്ധതിയുമായി മുന്നോട്ട് പോകാനാണ് സർക്കാ‌ർ നിലപാട്. ബി.ജെ.പി ഭരിക്കുന്ന കർണാടക സർക്കാരിന്റെ പിന്തുണ കൂടിയുണ്ടെങ്കിൽ കേന്ദ്രാനുമതി വേഗം ലഭ്യമാക്കാം എന്നാണ് കേരളത്തിന്റെ പ്രതീക്ഷ, ഡി.പി.ആർ ഉൾപ്പെടെയുള്ള സാങ്കേതിക വിവരങ്ങൾ കേരളം കർണാടകയ്ക്ക് കൈമാറും. തലശേരി മൈസൂരു, നിലമ്പൂർ നഞ്ചൻകോട് റെയിൽപാതകളുടെ കാര്യത്തിലും ചർച്ച നടക്കും.