കോന്നി : ഗ്രാമ പഞ്ചായത്ത് അതുമ്പുങ്കുളം ഞള്ളൂർ - എലിമുള്ളുംപ്ലാക്കൽ വനമേഖലയിൽ ബ്ലോക്ക് പഞ്ചായത്ത് അതുമ്പുംകുളം ഡിവിഷനിൽ 2020 - 21 വാർഷിക പദ്ധതിയിൽ ഊർജ്ജ മേഖലയിൽ ലഭിച്ച തുകയിൽ 2 ലക്ഷം രൂപ വകയിരുത്തി പ്രദേശത്ത് തെരുവ് വിളക്കുകൾ പ്രകാശിപ്പിക്കുന്നതിന് ആവശ്യമായി വൈദ്യുതി ലൈൻ നീട്ടുന്ന ജോലികൾ പൂർത്തിയായി. കോന്നി പഞ്ചായത്ത് സമ്പൂർണ വൈദ്യുതീകരണ പദ്ധതിയിൽ ഉൾപ്പെടുത്തി ഒന്നര കിലോമീറ്റർ ദൂരം 50 പോസ്റ്റുകളിലായി ബർബുകൾ സ്ഥാപിക്കുന്ന നടപടികൾ നടക്കുകയാണ്. വന്യമൃഗങ്ങളുടെ സ്ഥിരം സാന്നിദ്ധ്യമുള്ള വനമേഖലയിൽ പ്രദേശവാസികളും യാത്രക്കാരും രാത്രികാലങ്ങളിൽ ബുദ്ധിമുട്ടിയിരുന്നു. രാത്രിയിൽ യാത്രക്കാർ വന്യമൃഗങ്ങളുടെ ആക്രമണങ്ങളിൽ നിന്നും കഷ്ടിച്ചാണ് രക്ഷപെട്ടിരുന്നത്. എലിമുള്ളുംപ്ലാക്കൽ മുതൽ തണ്ണിത്തോട് വരെയുള്ള പ്രദേശത്ത് വൈദ്യുതീകരണം പൂർത്തീകരിച്ചിരുന്നു. കോന്നി പഞ്ചായത്ത് പ്രസിഡന്റ് സുലേഖ വി.നായർ സ്വിച്ച് ഓൺ കർമ്മം നിർവഹിച്ചു. ബ്ലോക്ക് പഞ്ചായത്ത് അംഗം പ്രവീൺ പ്ലാവിളയിൽ അദ്ധ്യക്ഷത വഹിച്ചു.കോന്നി പഞ്ചായത്തംഗം ശോഭ മുരളി, തണ്ണിത്തോട് പഞ്ചായത്തംഗം ഷാജി കാവനാൽ, രഞ്ചു.ആർ, വനം വകുപ്പ് ഉദ്യോഗസ്ഥരായ ജിജോ,സി.അനൂപ്, ലതീഷ് കുമാർ,അനു.സി,മോനിഷ് മാത്യു, മാത്തുക്കുട്ടി, മണിയൻ, ബിജോ ജോൺസൻ, ജോളി വലിയകാലായിൽ, ഉമ്മൻ വർഗീസ് എന്നിവർ സംസാരിച്ചു.