കൊല്ലം: മാതാ അമൃതാനന്ദമയീമഠത്തിന്റെ യുവജന വിഭാഗമായ അയുദ്ധിന്റെ നേതൃത്വത്തിൽ പ്ലാസ്റ്റിക് മാലിന്യങ്ങൾ നീക്കം ചെയ്ത് ആറ് കിലോമീറ്റർ ദൂരം കടൽത്തീരം ശുചീകരിച്ചു. ലോക ശുചീകരണ ദിനാചരണത്തിന്റെ ഭാഗമായാണ് അഴീക്കൽ ബീച്ച് മുതൽ കുഴിത്തറ ടൗൺ വരെ കടൽത്തീരം വൃത്തിയാക്കിയത്. ഇതിനായി ആയിരത്തോളം പേരാണ് ഒത്തുകൂടിയത്. മാതാ അമൃതാനന്ദമയീമഠത്തിലെ 200 ബ്രഹ്മചാരി,​ ബ്രഹ്മചാരിണിമാരും, 200 ആശ്രമഅന്തേവാസികളും, വിദേശികളായ നൂറോളം സന്ദർശകരും, അമൃതപുരി അമൃത വിശ്വ വിദ്യാപീഠത്തിലെ വിദ്യാർത്ഥികളും അദ്ധ്യാപകരുമടങ്ങുന്ന 500 അംഗ സംഘവും ദൗത്യത്തിൽ പങ്കാളികളായി.

നാല് മണിക്കൂർ പ്രയത്‌നം കൊണ്ട് ആറ് കിലോമീറ്റർ ദൂരത്തിൽ കടൽത്തീരം ശുചീകരിച്ച ഇവർ 500-ലധികം ചാക്ക് മാലിന്യമാണ് ഇവിടെ നിന്ന് ശേഖരിച്ചത്. ഇതിലൂടെ പ്ലാസ്റ്റിക് മാലിന്യം നീക്കം ചെയ്ത് പ്രകൃതി സംരക്ഷണത്തിൽ ഭാഗമാകാനും ഇതിലൂടെ കഴിഞ്ഞു. പ്രകൃതി സംരക്ഷണത്തിനായുള്ള ദേശീയ ഏജൻസിയായ പര്യാവരൺ സംരക്ഷന്റെ സഹകരണത്തോടെയാണ് അമൃത ദൗത്യത്തിൽ പങ്കാളിയായത്.