കുന്നിക്കാട്: ഇളമ്പൽ സർക്കാർ യു.പി സ്‌കൂളിന് സമീപത്തെ വിളക്കുടി ഗ്രാമപഞ്ചായത്ത് കുളത്തിൽ വിദ്യാർത്ഥി മുങ്ങിമരിച്ചു. ആരംപുന്ന ജീവൻ വില്ലയിൽ പ്രസാദ് - ലേഖ ദമ്പതികളുടെ മകൻ ജീവനാണ് (13) മരിച്ചത്. ഇന്നലെ വൈകിട്ട് 5 ഓടെ സ്‌കൂളിൽ നിന്ന് ഇളമ്പലിലുള്ള ട്യൂഷൻ സെന്ററിലേക്ക് പോകുന്നതിനിടെ കുളത്തിൽ കൂട്ടുകാരുമൊത്ത് കുളിക്കാൻ ഇറങ്ങുകയായിരുന്നു. കുട്ടികൾ പിരിഞ്ഞുപോയശേഷം യൂണിഫോമും ചെരുപ്പും ബാഗും കിടക്കുന്നത് കണ്ട് സംശയം തോന്നിയ നാട്ടുകാർ തെരച്ചിൽ നടത്തിയപ്പോഴാണ് കുളത്തിൽ വിദ്യാർത്ഥിയെ കണ്ടെത്തിയത്. പുനലൂരിലുള്ള സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വിവരം അറിയിച്ചതിനെ തുടർന്ന് പത്തനാപുരം അഗ്നിരക്ഷാ സേനയും കുന്നിക്കോട് പൊലീസും സ്ഥലത്തെത്തി മറ്റ് കുട്ടികൾ അപകടത്തിൽപ്പെട്ടിട്ടില്ലെന്ന് ഉറപ്പുവരുത്തി. ട്യൂഷൻ സെന്ററിലെ അദ്ധ്യാപിക സ്ഥലത്തെത്തി ബാഗ് പരിശോധിച്ചാണ് അപകടത്തിൽപ്പെട്ടത് ജീവനാണെന്ന് തിരിച്ചറിഞ്ഞത്. കുന്നിക്കോട് പൊലീസ് മേൽ നടപടി സ്വീകരിച്ചു. മൃതദേഹം പുനലൂർ താലൂക്ക് ആശുപത്രി മോർച്ചറിയിൽ. ഇന്ന് പോസ്റ്റ്മോർട്ടം നടക്കും. പുനലൂർ ചെമ്മന്തൂർ ഹൈസ്കൂളിലെ എട്ടാം ക്ലാസ് വിദ്യാർത്ഥിയാണ്. സഹോദരി: ഗംഗ.