നഗരസഭ ലോഗോ പ്രകാശനം ചെയർപേഴ്‌സൺ എം.യു. ഷിനിജ നിർവഹിക്കുന്നു.

കൊടുങ്ങല്ലൂർ: മാലിന്യമുക്ത നഗരം നിർമ്മിക്കുന്നതിനായി ദേശീയതലത്തിൽ നടത്തുന്ന അന്തർനഗര മത്സരമായ ഇന്ത്യൻ സ്വച്ഛത ലീഗിൽ കൊടുങ്ങല്ലൂർ നഗരസഭയും പങ്കാളികളാകുന്നു. കാശ്മീരിലെ അതിർത്തി നഗര പ്രദേശമായ ലേ മുതൽ കന്യാകുമാരി വരെയുള്ള 1800 ഓളം നഗരങ്ങൾ ടീം രൂപീകരിച്ച് മത്സരത്തിൽ പങ്കെടുക്കുകയും 17ന് സേവാ ദിവസ് ആസൂത്രണ പ്രവർത്തനങ്ങൾ നടത്തുകയും ചെയ്യും.

ഇതിന്റെ ഭാഗമായി നഗരസഭ 17ന് യുവാക്കളെയും, സന്നദ്ധ പ്രവർത്തകരെയും, വിദ്യാർത്ഥികളെയും, സാമൂഹിക പ്രവർത്തകരെയും, ജനപ്രതിനിധികളെയും പങ്കെടുപ്പിച്ച് നഗരത്തിൽ റാലിയും, ഫ്ലാഷ്മോബ് പോലുള്ള പ്രചാരണ പരിപാടികളും സംഘടിപ്പിക്കും. തുടർന്ന് ശുചീകരണ പ്രവർത്തനങ്ങൾ, പ്രചാരണ പരിപാടികൾ എന്നിവയും നടത്തും. നഗരസഭയുടെ ലോഗോ പ്രകാശനം ചെയർപേഴ്‌സൺ എം.യു. ഷിനിജ നിർവഹിച്ചു. വൈസ് ചെയർമാൻ കെ.ആർ. ജൈത്രൻ അദ്ധ്യക്ഷനായി. സ്റ്റാൻഡിംഗ് കമ്മിറ്റി ചെയർപേഴ്‌സൺമാരായ എൽസി പോൾ, ലത ഉണ്ണിക്കൃഷ്ണൻ, ഒ.എൻ. ജയദേവൻ, ഷീല പണിക്കശ്ശേരി, കൗൺസിലർ ടി.എസ്. സജീവൻ, നഗരസഭാ സെക്രട്ടറി വൃജ, ഹെൽത്ത് ഇൻസ്‌പെക്ടർ ബിജു എന്നിവർ പങ്കെടുത്തു.