കളക്ടറുടെ സാന്നിദ്ധ്യത്തിൽ യോഗം ചേർന്നു

പെരിങ്ങോട്ടുകര: പെരിങ്ങോട്ടുകര - അന്തിക്കാട് - കാഞ്ഞാണി റോഡ് സഞ്ചാര്യയോഗ്യമാക്കുന്നതിന് കളക്ടറുടെ സാന്നിദ്ധ്യത്തിൽ യോഗം ചേർന്നു.

മഴ പൂർണമായും മാറിയാൽ റോഡ് ടാർ ചെയ്യാനും, റോഡ് സഞ്ചാരയോഗ്യമാക്കിയതിന് ശേഷം മാത്രം കുടിവെള്ള വിതരണത്തിനായുള്ള ഡിസ്ട്രിബ്യൂഷൻ പൈപ്പുകൾ സ്ഥാപിക്കാനും യോഗത്തിൽ തീരുമാനമായി. ഇന്ന് മുതൽ പ്രവൃത്തി ആരംഭിക്കും. അമൃത് കുടിവെള്ള പദ്ധതിയുടെയും, അന്തിക്കാട്, ചാഴൂർ, താന്ന്യം കുടിവെള്ള പദ്ധതിയുടെയും പമ്പിംഗ് സ്റ്റേഷനുകളിൽ നിന്ന് ടാങ്കുകളിലേക്കുള്ള പൈപ്പിടുന്ന പ്രവൃത്തി പൂർത്തികരിച്ചു കഴിഞ്ഞതായി യോഗം വിലയിരുത്തി. യോഗത്തിൽ സി.സി മുകുന്ദൻ എം.എൽ.എ, കളക്ടർ ഹരിത വി. കുമാർ, അന്തിക്കാട് ബ്ലോക്ക് പഞ്ചായത്ത് പ്രസിഡന്റ് സി.കെ. കൃഷ്ണകുമാർ, ചാഴൂർ പഞ്ചായത്ത് പ്രസിഡന്റ് കെ.വി. ഇന്ദുലാൽ, അന്തിക്കാട് പഞ്ചായത്ത് പ്രസിഡന്റ് ജ്യോതി രാമൻ, താന്ന്യം പഞ്ചായത്ത് പ്രസിഡന്റ് രതി അനിൽകുമാർ തുടങ്ങിയവർ പങ്കെടുത്തു.

യോഗ തീരുമാനങ്ങൾ

• മഴ മാറിയാൽ ഉടൻ കുഴിയെടുത്ത് സ്ഥലത്ത് റീസ്റ്റോറേഷൻ പ്രവൃത്തികൾ യുദ്ധകാലാടിസ്ഥാനത്തിൽ പൂർത്തിയാക്കാൻ ജല അതോറിറ്റി ഉദ്യോഗസ്ഥർക്ക് നിർദ്ദേശം നൽകി.
• നിലവിൽ ടാർ ചെയ്ത് കുഴി രൂപപ്പെട്ട സ്ഥലങ്ങളിൽ ജി.എസ്.പി വൈറ്റ്മിക്‌സ് ഇട്ട് അടക്കും.
• പെരിങ്ങോട്ടുകര മൂന്നും കൂടിയ സെന്റർ മുതൽ അന്തിക്കാട് വരെയുള്ള റോഡ് സഞ്ചാരയോഗ്യമാക്കുന്ന പ്രവൃത്തി പൂർത്തീകരിച്ചതിന് ശേഷം മാത്രം പഴുവൽ സെന്റ് ആന്റണീസ് ആശുപത്രി മുതൽ കോലോത്തുംകടവ് വരെയുള്ള പൈപ്പിടൽ പ്രവൃത്തിക്ക് അനുമതി നൽകൂ.