കല്ലൂർ: തൊഴിലുറപ്പ് പദ്ധതിയിൽ രജിസ്റ്റർ ചെയ്തവർക്ക് വിദഗ്ദ്ധ പരിശീലനത്തിലൂടെ തൊഴിൽ നൈപുണ്യം നൽകുന്ന മികവ് പദ്ധതിക്ക് തൃക്കൂർ പഞ്ചായത്തിൽ തുടക്കം. തൊഴിലുറപ്പ് പദ്ധതി പ്രവർത്തനങ്ങൾ കൂടുതൽ വിപുലമാക്കുന്നതിന്റെ ഭാഗമായാണ് മികവ് നടപ്പാക്കുന്നത്. പദ്ധതിയുടെ ഉദ്ഘാടനം കൊടകര ബ്ലോക്ക് പഞ്ചായത്ത് പ്രസിഡന്റ് എം.ആർ. രഞ്ജിത്ത് നിർവഹിച്ചു. വാർഡ് 14 പാലക്കപറമ്പിൽ നടന്ന പരിപാടിയിൽ പഞ്ചായത്ത് പ്രസിഡന്റ് സൈമൺ നമ്പാടൻ അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് അംഗങ്ങളായ മിനി ഡെന്നി പനോക്കാരൻ, പോൾസൺ തെക്കുംപീടിക, പഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർമാൻ സലീഷ് ചെമ്പാറ, കെ.കെ. ദീപക്, അക്രഡിറ്റഡ് എൻജിനീയർ ഷാന്റി ജെയ്‌സൺ എന്നിവർ സംസാരിച്ചു.

കിലയുടെ നേതൃത്വത്തിൽ പരിശീലനം
കിലയുടെ നേതൃത്വത്തിൽ സംസ്ഥാന തൊഴിലുറപ്പ് മിഷനും തദ്ദേശ സ്വയംഭരണ സ്ഥാപനങ്ങളും ചേർന്നാണ് പദ്ധതി നടപ്പാക്കുന്നത്. പഞ്ചായത്തിലെ 50 വയസിൽ താഴെയുള്ള തൊഴിലുറപ്പ് തൊഴിലാളികൾക്കാണ് പരിശീലനം. അവിദഗ്ദ്ധ തൊഴിലാളികളെ വിദഗ്ദ്ധ തൊഴിലാളികളാക്കി മാറ്റുക എന്നതാണ് പദ്ധതിയുടെ ലക്ഷ്യം. വിദഗ്ദ്ധ തൊഴിലാളികളായി മാറുന്നവർക്ക് ദിവസവേതനം 311 രൂപയിൽ നിന്ന് 780 രൂപയായി വർദ്ധിക്കും.