ചാലക്കുടി: നിയോജകമണ്ഡലത്തിലെ പൊതുമരാമത്ത് നിർമ്മാണ പ്രവർത്തനങ്ങളുടെ തുടർ നടപടിയുടെ ഭാഗമായി പൊതുമരാമത്ത് വകുപ്പിന്റേയും ജല അതോറിറ്റിയുടേയും സംയുക്ത യോഗം ചേരാൻ തീരുമാനം. ഇരു വകുപ്പുകളുടെയും കീഴിലെ നിർമ്മാണ പ്രവർത്തനങ്ങൾ ഏകോപിപ്പിച്ച് സുഗമമായ നടത്തിപ്പ് ഉറപ്പുവരുത്തുകയാണ് ലക്ഷ്യം. മണ്ഡലത്തിലെ പൊതുമരാമത്ത് പ്രവൃത്തികളുടെ നിർമ്മാണ പുരോഗതി വിലയിരുത്താൻ ടി.ജെ. സനീഷ്‌കുമാർ എം.എൽ.എയുടെ അദ്ധ്യക്ഷതയിൽ ചേർന്ന ഉദ്യോഗസ്ഥ യോഗത്തിലാണ് തീരുമാനം. കിഫ്ബി നിർമ്മാണ പ്രവൃത്തികൾ അവലോകനം നടത്തുന്നതിന് വരും ദിവസങ്ങളിൽ പ്രത്യേക യോഗം ചേരാൻ തീരുമാനിച്ചതായും എം.എൽ.എ അറിയിച്ചു. പൊതുമരാമത്ത് വകുപ്പ് നോഡൽ ഓഫിസർ റീനു ചാക്കോ, അസിസ്റ്റന്റ് എക്‌സിക്യൂട്ടീവ് എൻജിനിയർമാരായ ഒ.എച്ച്. റംലത്ത്, എൻ.വി. ആന്റണി, ബി.പി. സൈനബ, അസിസ്റ്റന്റ് എൻജിനിയർമാരായ സി.കെ. ലിജി, ഡോളി ജോസഫ്, കെ. സ്മിത തുടങ്ങിയവർ പങ്കെടുത്തു.