വ൪ക്കല: വർക്കലയിൽ വൃദ്ധനെ വെട്ടി പരിക്കേൽപ്പിച്ചതായി പരാതി. കുരയ്‌ക്കണ്ണി ആമിന മൻസിലിൽ ഹാഷിമിനെയാണ് (64) വീടിന് മുന്നിൽ വെട്ടിപ്പരിക്കേൽപ്പിച്ചത്. കഴിഞ്ഞ ദിവസം രാത്രി 9.30 ഓടെയാണ് സംഭവം. നിരവധി ക്രിമിനൽ കേസുകളിലെ പ്രതിയായ ഫാന്റം പൈലി എന്ന് വിളിക്കുന്ന ഷാജിയാണ് ഹാഷിമിനെ വെട്ടി പരിക്കേൽപ്പിച്ചതെന്ന് പരാതിയിൽ പറയുന്നു.

ഗുരുതരമായി പരിക്കേറ്റ ഹാഷിമിനെ വർക്കലയിലെ സ്വകാര്യ ആശുപത്രിയിൽ പ്രാഥമിക ചികിത്സ നൽകിയ ശേഷം തിരുവനന്തപുരം മെഡിക്കൽ കോളേജിലേക്ക് മാറ്റി. വീടിനുമുന്നിൽ ബഹളംവച്ചത് ചോദ്യം ചെയ്‌തതിൽ ക്ഷുഭിതനായ ഫാന്റം പൈലി വാൾ ഉപയോഗിച്ച് ഹാഷിമിനെ മാരകമായി വെട്ടി പരിക്കേൽപ്പിക്കുകയായിരുന്നു.