തിരുവനന്തപുരം: റിസോഴ്സ് അദ്ധ്യാപകരുടെ ഇ.പി.എഫ് വിഹിതത്തിൽ ആറ്റിങ്ങൽ ഡയറ്റ് ഓഫീസ് കുടിശ്ശിക വരുത്തിയത് 1.15 കോടി രൂപ. ഇക്കഴിഞ്ഞ 16ന് തിരുവനന്തപുരം ഇ.പി.എഫ് ഓഫീസിലെ അധികൃതർ നേരിട്ടെത്തി ഓഫീസ് ജപ്‌തി നടത്തി. എന്നിട്ടും തീരുമാനമെടുക്കാതെ ഇരുട്ടിൽ തപ്പുകയാണ് നടപടിയെടുക്കേണ്ട ഉത്തരവാദപ്പെട്ടവർ. ആറ്റിങ്ങലിലെ ഓഫീസിൽ ജപ്‌തി നോട്ടീസ് പതിക്കുകയും കവാടത്തിൽ ബാനർ സ്ഥാപിക്കുകയും ചെയ്‌തിട്ടുണ്ട്.

സ്‌കൂളിലെ ഭിന്നശേഷി വിഭാഗം കുട്ടികളുട‌െ പഠന പുരോഗതിക്ക് 2001 മുതൽ കരാറടിസ്ഥാനത്തിൽ നിയമിച്ചിരുന്ന 92 റിസോഴ്സ് അദ്ധ്യാപകരുടെ ഇ.പി.എഫ് വിഹിതത്തിലാണ് കുടിശ്ശിക വരുത്തിയത്. വിദ്യാഭ്യാസ വകുപ്പി​ന്റെ തണുപ്പൻ മട്ടുകാരണം വെട്ടി​ലായത് ജി​ല്ലാ വി​ദ്യാഭ്യാസ പരി​ശീലന ഇൻസ്റ്റി​റ്റ്യൂട്ടാണ് (ഡയറ്റ്). സർക്കാർ തന്നെയാണ് ഈ തുക അടയ്ക്കേണ്ടത്.

ആറായിരം രൂപയാണ് തുടക്കത്തിൽ റി​സോഴ്സ് അദ്ധ്യാപകർക്ക് ഏകീകൃത ശമ്പളമായി നൽകിയത്. പിന്നീട് തുക കൂട്ടിയതിന് ആനുപാതികമായി ഇ.പി.എഫും ഏർപ്പെടുത്തി. ഇ.പി​.എഫ് വി​ഹി​തം അടയ്‌ക്കുന്നി​ല്ലെന്ന് ചൂണ്ടി​ക്കാട്ടി​ അദ്ധ്യാപകർ കോടതി​യെ സമീപി​ച്ചതി​നെ തുടർന്ന് 2001 ആഗസ്റ്റ് മുതൽ 2013 ആഗസ്റ്റ് വരെ 1.25 കോടി​ രൂപ പി​.എഫ് വി​ഹി​തത്തി​ൽ അടി​യന്തരമായി​ അടയ്‌ക്കാൻ കോടതി​ ഉത്തരവി​ട്ടെങ്കി​ലും പണം അടയ്‌ക്കാൻ വി​ദ്യാഭ്യാസ വകുപ്പ് നടപടി​കളൊന്നും കൈക്കൊണ്ടി​ല്ല. ഏറെ പ്രതി​ഷേധങ്ങൾക്കൊടുവി​ൽ 10 ലക്ഷം രൂപ അടച്ചു. 1.15 കോടി​ രൂപയാണ് ഈ ഇനത്തി​ൽ ഇപ്പോഴും കുടി​ശി​കയുള്ളത്.

തുക അടയ്‌ക്കാൻ നി​രവധി​ തവണ ഇ.പി​.എഫ് അധി​കൃതർ ഡയറ്റ് പ്രി​ൻസി​പ്പൽമാർക്ക് കത്തുനൽകി​. പ്രി​ൻസി​പ്പൽമാർ യഥാസമയം ഇക്കാര്യം വി​ദ്യാഭ്യാസ വകുപ്പ് അധി​കൃതരെ അറി​യി​ച്ചെങ്കി​ലും നടപടിയുണ്ടായില്ല. വി​ദ്യാഭ്യാസ വകുപ്പി​ന്റെ ആവശ്യം പരി​ഗണി​ക്കാൻ ധനവകുപ്പ് തയാറായി​ല്ലെന്നാണ് അധി​കൃതർ പറയുന്നത്. തി​രുവനന്തപുരത്തെ ഡയറ്റി​നു മാത്രമായി​ പണം നൽകാനാവി​ല്ലെന്നും അങ്ങനെ വന്നാൽ മറ്റു ജി​ല്ലക്കാരും കോടതി​യെ സമീപി​ക്കാൻ സാദ്ധ്യതയുണ്ടെന്നാണത്രേ ധനവകുപ്പി​ന്റെ അഭി​പ്രായം.