തിരുവനന്തപുരം: കാര്യവട്ടം ഗ്രീൻഫീൽഡ് സ്റ്റേഡിയത്തിൽ 28നു നടക്കുന്ന ഇന്ത്യ -ദക്ഷിണാഫ്രിക്ക ട്വന്റി-20 മത്സരത്തിനുള്ള ദക്ഷിണാഫ്രിക്കൻ ടീം നാളെ തിരുവനന്തപുരത്തെത്തും പുലർച്ചെ 3.10ന് അബുദാബിയിൽ നിന്നാണ് ടീം തിരുവനന്തപുരം വിമാനത്താവളത്തിലെത്തുന്നത്. ഇന്ത്യൻ ടീം 26ന് വൈകിട്ട് 4.30നെത്തും. ദക്ഷിണാഫ്രിക്ക 25നുതന്നെ സ്‌പോർട്സ് ഹബിൽ പരിശീലനത്തിനിറങ്ങും. 25നും 26നും വൈകിട്ട് അഞ്ചു മുതൽ എട്ടു വരെയും മത്സരത്തിന്റെ തലേദിവസമായ 27ന് ഉച്ചയ്ക്ക് ഒന്നു മുതൽ നാലുവരെയുമാണ് ദക്ഷിണാഫ്രിക്കൻ ടീം പരിശീലനം നടത്തുക. 27ന് വൈകിട്ട് അഞ്ച് മുതൽ എട്ടുവരെ ഇന്ത്യൻ ടീമും ഗ്രീൻഫീൽഡിൽ പരിശീനം നടത്തും. മുൻ കേരള ക്രിക്കറ്റ് ടീം ക്യാപ്ടൻ കെ.എൻ. അനന്തപത്മനാഭനും നിതിൻ മേനോനുമാണ് മത്സരം നിയന്ത്രിക്കുന്നത്. ജെ.ആർ.മദനഗോപാലാണ് ടി വി അംപയർ. വീരേന്ദർ ശർമ്മ ഫോർത്ത് അംപയറാകും. ജവഗൽ ശ്രീനാഥാണ് മാച്ച് റഫറി. സാമുവൽ ഹോപ്കിൻസും ആൽഫി ഡെല്ലറുമാണ് ഡി.ആർ.എസ് ടെക്നിഷ്യന്മാർ.

മത്സരത്തിന്റെ 65 ശതമാനം ടിക്കറ്റുകളും വിറ്റുകഴിഞ്ഞു. അപ്പർ ടിയറിലെ 2500 ടിക്കറ്റുകൾ കൂടിയാണ് ഇനി ബാക്കിയുള്ളത്. സ്റ്റേഡിയത്തിൽ പ്രവേശിക്കുന്നതിന് ടിക്കറ്റിനൊപ്പം ഫോട്ടോ ഐഡി കൂടി കാണിക്കണം.