പാറശാല: കുട്ടികൾ,ഗർഭിണികൾ,മുലയൂട്ടുന്ന അമ്മമാർ,കൗമാര പ്രായക്കാരായ പെൺകുട്ടികൾ എന്നിവരിലെ പോഷക സമൃദ്ധി ലക്ഷ്യമിട്ടുളള പോഷൻ അഭിയാൻ പദ്ധതിയുടെ ഭാഗമായ ‘പോഷൺ മാ’ മാസാചരണത്തിന് കൊല്ലയിൽ ഗ്രാമപഞ്ചായത്തിൽ തുടക്കമായി. 30വരെ നീണ്ടു നിൽക്കുന്ന മാസാചരണത്തിൽ വനിതാ ശിശുക്ഷേമ വകുപ്പ്,ഐ.സി.ഡി.എസ്,നാഷണൽ ന്യൂട്രിഷൻ മിഷൻ,സമ്പുഷ്ട കേരളം ആരോഗ്യ വകുപ്പ് എന്നിവരുടെ നേതൃത്വത്തിൽ വിവിധ പരിപാടികൾ സംഘടിപ്പിക്കും. മാസാചരണത്തിന്റെയും ഏകദിന സെമിനാറിന്റെയും പോഷകാഹാര പ്രദർശന മേളയുടെയും ഉദ്ഘാടനം കൊല്ലയിൽ ഗ്രാമപഞ്ചായത്ത് പ്രസിഡന്റ് എൻ.എസ്.നവനീത്കുമാർ നിർവഹിച്ചു. ധനുവച്ചപുരം ധനുശ്രീ ഓഡിറ്റോറിയത്തിൽ നടന്ന ചടങ്ങിൽ ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ വി.എസ്.അനില അദ്ധ്യക്ഷത വഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ബൈജു,ഐ.സി.ഡി.എസ് സൂപ്പർവൈസർ സിന്ധു,ടീച്ചേഴ്സ് ലീഡർ അനിത,സ്കൂൾ കൗൺസിലർ രാഖി,വാർഡ് മെമ്പർമാർ,അങ്കണവാടി ഗുണഭോക്താക്കൾ,അങ്കണവാടി പ്രവർത്തകർ എന്നിവർ പങ്കെടുത്തു.