കൽപ്പറ്റ: ഓണക്കാലത്ത് പച്ചക്കറി ഉത്പ്പന്നങ്ങളുടെ വിലക്കയറ്റം നിയന്ത്രിക്കുന്നതിന്റെ ഭാഗമായി ജില്ലാ ഹോർട്ടി കോർപ്പിന്റെ ആഭിമുഖ്യത്തിൽ സഞ്ചരിക്കുന്ന ഹോർട്ടി സ്റ്റോർ ജില്ലയിൽ പര്യടനം നടത്തുന്നു. കൽപ്പറ്റ സിവിൽ സ്റ്റേഷനിൽ നിന്നും ആരംഭിച്ച പര്യടനം ജില്ലാ പഞ്ചായത്ത് വികസനകാര്യ സ്റ്റാന്റിംഗ് കമ്മിറ്റി ചെയർപേഴ്സൺ ഉഷ തമ്പി ഫ്ളാഗ് ഓഫ് ചെയ്തു. കൽപ്പറ്റ മുനിസിപ്പാലിറ്റി ചെയർമാൻ കേയംതൊടി മുജീബ് അദ്ധ്യക്ഷത വഹിച്ചു. ഹോർട്ടി സ്റ്റോറിലെ ആദ്യ വിൽപന ജില്ലാ പഞ്ചായത്ത് ക്ഷേമകാര്യ സ്റ്റാന്റിംഗ് കമ്മിറ്റി ചെയർമാൻ ജൂനൈദ് കൈപ്പാണി സംസ്ഥാന ഹോർട്ടികോർപ്പ് ഡയറക്ടർ ബോർഡ് അംഗം വിജയൻ ചെറുകരയ്ക്ക് നൽകി നിർവ്വഹിച്ചു. സഞ്ചരിക്കുന്ന ഹോർട്ടി സ്‌റ്റോർ ജില്ലയിലെ വിവിധ സ്ഥലങ്ങളിലൂടെ 7 വരെ പര്യടനം നടത്തും. പൊതുജനങ്ങൾക്ക് മിതമായ നിരക്കിൽ പച്ചക്കറി ഹോർട്ടികോർപ്പിലൂടെ ലഭ്യമാക്കും. വൈകീട്ട് 6 വരെ സഞ്ചരിക്കുന്ന ഹോർട്ടിസ്റ്റോറിൽ നിന്നും സാധനങ്ങൾ വാങ്ങാം. പച്ചക്കറികൾക്കൊപ്പം മൂന്ന് തരം തേൻ, വെള്ളിച്ചെണ്ണ, അരി എന്നിവയും ഹോർട്ടി സ്റ്റോറിൽ വിൽപ്പനയ്ക്കുണ്ട്. സഞ്ചരിക്കുന്ന ഹോർട്ടി സ്റ്റോറിന് പുറമെ കൃഷി വകുപ്പ്, ഹോർട്ടി കോർപ്പ്, വെജിറ്റബിൾ ആന്റ് ഫ്രൂട്ട് പ്രമോഷൻ കൗൺസിൽ എന്നിവയുടെ ആഭിമുഖ്യത്തിൽ നാളെ മുതൽ 7 വരെ ജില്ലയിൽ 47 ഓണച്ചന്തകളും ഒരുക്കുന്നുണ്ട്.
ഹോർട്ടികോർപ്പ് ജില്ലാ മാനേജർ സി.എം ഈശ്വരപ്രസാദ്, കൃഷി ഡെപ്യൂട്ടി ഡയറക്ടമാരായ ജ്യോതി പി ബിന്ദു, കെ മമ്മൂട്ടി, രാജി വർഗീസ്, ഹോർട്ടികോർപ്പ് അസിസ്റ്റന്റ് മാനേജർ സിബി ചാക്കോ, വാർഡ് കൗൺസിലർ ടി മണി എന്നിവർ സന്നിഹിതരായിരുന്നു.