മാവേലിക്കര: കണ്ടിയൂർ നവരാത്രി സംഗീതോത്സവ സമിതിയുടെ സുവർണമുദ്ര പുരസ്​കാരം ഡോ.സദനം കെ.ഹരികുമാറിന് സമ്മാനിച്ചു. കണ്ടിയൂർ മഹാദേവക്ഷേത്രത്തിലെ നവരാത്രി മണ്ഡപത്തിൽ കൂടിയ സുവർണ മുദ്ര പുരസ്​കാരദാന സമ്മേളനം ചലച്ചിത്ര സംവിധായകൻ മധു ഇറവങ്കര ഉദ്ഘാടനം ചെയ്തു.

കണ്ടിയൂർ നവരാത്രി സംഗീതോത്സവ സമിതി ഏർപ്പെടുത്തിയ പുരസ്​കാരം കർണാടക സംഗീതം, കഥകളി സംഗീതം, കഥകളി അഭിനയം, കഥകളി ഗവേഷണം, ശില്പകല എന്നീ മേഖലകളിൽ പ്രാഗത്ഭ്യം തെളിയിച്ച ഡോ.സദനം കെ.ഹരികുമാറിന് മധു ഇറവങ്കര സമ്മാനിച്ചു. 10,008 രൂപയും ഫലകവും പ്രശസ്തി പത്രവും അടങ്ങുന്നതാണ് പുരസ്​കാരം. കണ്ടിയൂർ നവരാത്രി സംഗീതോത്സവ സമിതി ആണ് ചടങ്ങുകൾ സംഘടിപ്പിച്ചത്. പ്രസിഡന്റ് മാവേലിക്കര ഗോപകുമാർ അദ്ധ്യക്ഷനായി. മാവേലിക്കര ബാലചന്ദ്രൻ, ഡോ.രവിശങ്കർ, ആർ.മഹാദേവൻ, അഡ്വ.എൻ.നാഗേന്ദ്രമണി, കെ.പി.സുകുമാരൻ, വിജയം വേണഗോപാൽ, പ്രൊഫ. ഡി. പ്രകാശ്, എസ്.രാമചന്ദ്രൻ നായർ, കണ്ടിയൂർ കൃഷ്ണകുമാർ എന്നിവർ സംസാരിച്ചു.