ആലപ്പുഴ: സർക്കാർ സബ്സിഡിയുള്ള ഗാർഹിക പാചക വാതക സിലിണ്ടറുകൾ വാണിജ്യാവശ്യത്തിന് ഉപയോഗിക്കുന്നതായി ലഭിച്ച പരാതിയുടെ അടിസ്ഥാനത്തിൽ ജില്ലാ സപ്ലൈ ഓഫീസർ ടി.ഗാനദേവിയുടെ നേതൃത്വത്തിൽ നടത്തിയ പരിശോധനയിൽ രണ്ട് സിലിണ്ടറുകൾ പിടികൂടി. ചാത്തനാട് താണുപറമ്പിൽ നവാസിന്റെ ഉടമസ്ഥതതയിലുള്ള ഫ്രഷ് ചിപ്‌സ് സെന്റർ എന്ന ചായക്കടയിൽ നടത്തിയ പരിശോധനയിലാണ് ഗാർഹിക സിലിണ്ടറുകൾ പിടികൂടിയത്. സിലിണ്ടറുകൾ പിടിച്ചെടുത്ത് ഗ്യാസ് ഏജൻസിയിൽ ഏൽപ്പിച്ചു. പരിശോധനയിൽ അമ്പലപ്പുഴ താലൂക് സപ്ലൈ ഓഫിസിലെ റേഷനിംഗ് ഇൻസ്പെക്ടർമാരായ വി.ബിജി, ഷാഹിന അബ്ദുല്ല എന്നിവർ പങ്കെടുത്തു.