ചേർത്തല: ദേശീയപാതയിൽ പട്ടണക്കാടും ചേർത്തല പൊലീസ് സ്‌​റ്റേഷന് സമീപത്തുമുണ്ടായ വാഹനാപകടങ്ങളിൽ രണ്ടുപേർ മരിച്ചു.

പട്ടണക്കാട് മിൽമ കാലിത്തീ​റ്റ ഫാക്ടറിക്ക് സമീപം സൈക്കിളിൽ കാറിടിച്ച് ഷാപ്പ് ജീവനക്കാരനായ പട്ടണക്കാട് ഗ്രാമപഞ്ചായത്ത് ആറാം വാർഡിൽ നീലകണ്ണാട്ടു നികർത്തിൽ മനോഹരൻ (62) മരിച്ചു. ഇന്നലെ രാവിലെ ആറോടെയായിരുന്നു അപകടം. തുറവൂർ താലൂക്ക് ആശുപത്രിയിലെത്തിച്ചെങ്കിലും രക്ഷിക്കാനായില്ല. ഭാര്യ:ശശികല. മക്കൾ: ആശ,മഞ്ജു,ഐശ്വര്യ. മരുമക്കൾ:സിലൻ,സുരേഷ്.
ചേർത്തല പൊലീസ് സ്​റ്റേഷനു സമീപം ഇൻസുലേറ്റഡ് വാൻ ഇടിച്ച് കാൽനട യാത്രക്കാരൻ തണ്ണീർമുക്കം പഞ്ചായത്ത് 20-ാംവാർഡ് മണവേലി തെക്ക് ദീപു നിവാസിൽ വിശ്വനാഥൻ (78) ആണ് മരിച്ചത്.

നിറുത്താതെ പോയ വാഹനം ആലപ്പുഴ ബൈപാസിനു സമീപത്തുവെച്ച് പൊലീസ് പിടികൂടി.
തിങ്കളാഴ്ച രാവിലെയായിരുന്നു അപകടം. കർണാടക സ്വദേശിയാണ് വാഹനം ഓടിച്ചിരുന്നത്. ചേർത്തല പൊലീസ് വാഹനം കസ്​റ്റഡിയിലെടുത്തു. ഭാര്യ തങ്കമണി മരിച്ച് പത്താം ദിനത്തിലാണ് വിശ്വനാഥന്റെ മരണം. മക്കൾ: ദീപ,ദീപു. മരുമക്കൾ:ഷാജി,സോണി. സഞ്ചയനം ശനിയാഴ്ച രാവിലെ പത്തിന്.