മാന്നാർ: ടൂറിസം വകുപ്പിന്റെ ആഭിമുഖ്യത്തിൽ നവംബർ അഞ്ചിന് പാണ്ടനാട് മിത്രമഠം നെട്ടായത്തിൽ നടക്കുന്ന ചാമ്പ്യൻസ് ബോട്ട് ലീഗ് മത്സരങ്ങളുടെ ഭാഗമായി മാന്നാറിൽ നടക്കുന്ന സർഗ്ഗോൽസവത്തെ നാട് നെഞ്ചേറ്റി​. സർഗോൽസവം നടക്കുന്ന മാന്നാർ നായർ സമാജം മൈതാനിയിലെ വേദിയിലും ചേർന്നുള്ള അമ്യൂസ്‌മെന്റ് പാർക്കിലും വൻ തി​രക്കാണ് അനുഭവപ്പെടുന്നത്.

മൂന്നാം ദിവസം 'പാലാപ്പളളി തിരുപ്പള്ളി' ഫെയിം അതുൽ നറുകരയും സംഘവും നാട്ടുപാട്ടരങ്ങ് അവതരിച്ചപ്പോൾ സദസ് ജന നി​ബി​ഡമായി​രുന്നു. മാന്നാറിനെ ഇളക്കിമറിച്ചുള്ള നാടൻ പാട്ടും ദൃശ്യാവിഷ്‌കാരവും കലാസ്വാദകർക്ക് നവ്യാനുഭവമായി. 20 ഓളം കലാകാരൻമാർ ചെണ്ടയും ഉടുക്കും പറയും തുടിയും കൊട്ടി ആടിപ്പാടിയതിനൊപ്പം പ്രാചീന കലകളുടെ ദൃശ്യാവിഷ്‌കാരം കൂടിയായപ്പോൾ സദസ് ഇളകിമറിഞ്ഞു. ഇന്ന് രാവിലെ​ 10 ന് ദേശപ്പെരുമയുടെ സർഗ്ഗചാരുതയുടെ ആവിഷ്‌കാരം വരമുദ്ര. വൈകിട്ട് 5ന് പൈതൃക ടൂറിസത്തിന്റെ സാദ്ധ്യതകൾ എന്ന വിഷയത്തിൽ സെമിനാ. പ്രൊഫ.പി.ഡി. ശശിധരൻ അദ്ധ്യക്ഷത വഹിക്കും. മന്ത്രി പി.രാജീവ് ഉദ്​ഘാടനം ചെയ്യും. ടൂറിസം ഡറക്ടർ പി.ബി. നൂഹ് മുഖ്യാതിഥിയാകും. പ്ലാനിംഗ് ബോർഡ് അംഗം സന്തോഷ് ജോർജ്ജ് കുളങ്ങര വിഷയാവതരണം നടത്തും. വൈകിട്ട് ആറിന് രാവണീശ്വരം ഗോത്രപ്പൊലിമ കാസർകോഡ് അവതരിപ്പിക്കുന്ന ഗോത്ര ഗാനങ്ങൾ. ആദിവാസിപ്പാട്ടുകൾ, മുറം നൃത്തം, വടി നൃത്തം. 8 ന് ആലപ്പുഴ റെയ്ബാന്റെ മെഗാ സ്റ്റേജ് ഷോ.