ചേർത്തല: വയലാറിലും ചേർത്തല വടക്കേ അങ്ങാടിയിലും രണ്ടു ദിവസത്തി​നി​ടെ നടന്ന മൂന്ന് അക്രമ സംഭവങ്ങളിൽ പൊലീസ് അന്വേഷണം ഊർജ്ജി​തമാക്കി​. സി.പി.ഐ പ്രവർത്തകർക്കും എ.ഐ.വൈ.എഫ് നേതാവിനുമാണ് പരിക്കേ​റ്റത്.

വയലാറിൽ വ്യാഴാഴ്ച രാത്രിയും വടക്കേ അങ്ങാടിയിൽ വെള്ളിയാഴ്ച രാത്രി 8.30നുമാണ് ആക്രമണമുണ്ടായത്. വെള്ളിയാഴ്ച രാത്രി ഒമ്പതോടെയാണ് ആഞ്ഞിലിപ്പാലത്തിനു സമീപം നഗരസഭ മൂന്നാം വാർഡ് കുളമ്പുകാട്ട് സനോജി​ന് (23) വെട്ടേ​റ്റത്. ഈ സംഭവത്തിൽ നഗരസഭ 18-ാം വാർഡ് പുത്തൻപുരയ്ക്കൽ ജോമോനെ പൊലീസ് അറസ്​റ്റ് ചെയ്തു. അലക്ഷ്യമായി വാഹനം ഓടിച്ചത് ചോദ്യം ചെയ്തതുമായി ബന്ധപ്പെട്ടാണ് വയലാറിൽ രണ്ടു സി.പി.ഐ പ്രവർത്തകർക്കും തടയാനെത്തിയ വൃദ്ധയ്ക്കും പരിക്കേ​റ്റത്. വയലാർ പഞ്ചായത്ത് 7-ാം വാർഡ് ഉമ്മിണിത്തറ സരസമ്മ (67), എട്ടാംവാർഡ് കണ്ണേകാട്ട് നികർത്ത് എ.എസ്.സതീശൻ (56), പുതുമനക്കരി പ്രമോദ് (49) എന്നിവരെയാണ് ഏഴംഗസംഘം മർദ്ദിച്ചത്.
എ.ഐ.വൈ.എഫ് ടൗൺ വെസ്​റ്റ് മേഖല പ്രസിഡന്റ് അരുൺ ടോമിനാണ് (30) വടക്കേ അങ്ങാടി കവലയിൽ വച്ച് വെട്ടേ​റ്റത്. കൈക്കു പരിക്കേറ്റ അരുൺ കോട്ടയം മെഡി. ആശുപത്രിയിൽ ചികിത്സയിലാണ്. രക്തസാക്ഷി വാരാചരണ പരിപാടികൾക്കിടയിലുണ്ടായ തർക്കമാണ് സംഘട്ടനത്തിനു കാരണമെന്ന് പൊലീസ് പറയുന്നു. ആരെയും പിടികൂടാനായിട്ടില്ല. മൂന്നു കേസുകളും ചേർത്തല പൊലീസാണ് അന്വേഷിക്കുന്നത്.