മാവേലിക്കര- സാധുജന പരിപാലന സംഘം ജില്ലാ വാർഷിക പ്രതിനിധി സമ്മേളനം ഇന്ന് മാവേലിക്കര മുനിസിപ്പൽ ടൗൺ ഹാളിൽ നടക്കും. രാവിലെ 10ന് മാവേലിക്കര പടിഞ്ഞാറെ നടയിൽ നവീകരിച്ച അയ്യൻകാളിയുടെ സ്മൃതിമണ്ഡപം നഗരസഭാധ്യക്ഷൻ കെ.വി ശ്രീകുമാർ ഉദ്ഘാടനം ചെയ്യും. പ്രതിനിധി സമ്മേളനം സംസ്ഥാന പ്രസിഡൻ്റ് ഉണ്ണികൃഷ്ണൻ മാവേലിക്കര ഉദ്ഘാടനം ചെയ്യും. ജില്ലാ പ്രസിഡന്റ് സുരേഷ് സഹദേവൻ അധ്യക്ഷനാകും. സംസ്ഥാന ജനറൽ സെക്രട്ടറി സുരേഷ് ജഗതി സംഘടനാ റിപ്പോർട്ടും ജില്ലാ സെക്രട്ടറി കെ.സുരേഷ് കുമാർ പ്രവർത്തന റിപ്പോർട്ടും അവതരിപ്പിക്കും. 3ന് ഘോഷയാത്ര, 3.30ന് സാംസ്ക്കാരിക സമ്മേളനം ഡെപ്യൂട്ടി​ സ്പീക്കർ ചിറ്റയം ഗോപകുമാർ ഉദ്ഘാടനം ചെയ്യും. കൊടിക്കുന്നിൽ സുരേഷ് എം.പി മുഖ്യാതിഥിയാകും. എം.എസ് അരുൺകുമാർ മുഖ്യപ്രഭാഷണം നടത്തും. കെ.വി ഗോപിനാഥൻ രചിച്ച പുസ്തകത്തി​ന്റെ പ്രകാശനവും മുനിസിപ്പൽ, പഞ്ചായത്ത് ജനപ്രതിനിധികൾ, ഉന്നത പരീക്ഷകളിൽ വിജയിച്ച വിദ്യാർഥികൾ എന്നിവർക്ക് ആദരവും നടക്കുമെന്ന് സംഘാടക സമിതി ചെയർമാൻ കെ ശ്രീധരനും കൺവീനർ കെ സുരേഷ് കുമാറും അറിയിച്ചു.