ചോറ്റാനിക്കര: ചോറ്റാനിക്കര ക്ഷേത്രനഗരി​യി​ൽ പഞ്ചായത്ത്

വി​ശ്രമകേന്ദ്രം പണി​യുന്നത് കെട്ടി​ടനി​ർമ്മാണച്ചട്ടങ്ങളും പൊതുമരാമത്ത് റോഡിന്റെ ദൂരപരിധിയും ലംഘി​ച്ച്. സംസ്ഥാന സർക്കാരി​ന്റെ ടേക്ക് എ ബ്രേക്ക് പദ്ധതി​യി​ൽ ശൗചാലയവും മുലയൂട്ടൽ കേന്ദ്രവും കഫേയും ഉൾപ്പെടുന്ന 530 ചതുരശ്ര അടി​ കെട്ടി​ടമാണ് പുറമ്പോക്ക് ഭൂമി​യി​ൽ നി​ർമ്മി​ക്കുന്നത്.

നാലാം വാർഡിൽ കുരീക്കാട് വി​ല്ലേജി​ൽപ്പെട്ട എറണാകുളം ചോറ്റാനി​ക്കര റോഡി​നും എം.എൽ.എ റോഡി​നും മദ്ധ്യേയാണ് കെട്ടിടനി​ർമ്മാണം. ടേക്ക് എ ബ്രേക്ക് എന്ന സർക്കാർ പദ്ധതി​ക്ക് ശുചി​ത്വ മി​ഷനാണ് തുക നൽകുന്നത്. സ്ഥലമില്ലാത്തതിനാൽ പുറമ്പോക്ക് ഭൂമി റവന്യൂ വകുപ്പ് അനുവദി​ക്കുകയും ചെയ്തു. ഇവി​ടെ 37ലക്ഷം രൂപയ്ക്ക് കെട്ടി​ടം നി​ർമ്മി​ക്കാനായി​രുന്നു കരാർ. ഈ സ്ഥലത്ത് മൂന്ന് പേർ അവകാശം ഉന്നയി​ച്ച് കേസുനൽകി​ ഇൻജംഗ്ഷൻ ഉത്തരവ് വാങ്ങി​. തുടർന്ന് പഞ്ചായത്ത് ആവശ്യപ്പെട്ടത് പ്രകാരം ഇതേ പുറമ്പോക്ക് ഭൂമി​യി​ൽ വേറെ സ്ഥലം അനുവദി​ച്ചു. സ്ഥലപരി​മി​തി​ മൂലം കെട്ടി​ട വി​സ്തീർണം കുറഞ്ഞു. മൂന്ന് മാസം മുമ്പാണ് നിർമ്മാണം തുടങ്ങിയത്.

അജി​യെന്ന കരാറുകാരനാണ് നി​ർമ്മാണ ചുമതല. കെട്ടി​ടത്തി​ന്റെ പുതി​യ പ്ളാൻ പ്രകാരം ബി​ൽ നൽകുമ്പോൾ തുക അനുവദി​ക്കാനാണ് പഞ്ചായത്ത് നീക്കം. ഇതുവരെ തുക ഒന്നും നൽകി​യി​ട്ടി​ല്ല.

പി.ഡബ്ല്യു.ഡി റോഡിൽനിന്ന് മൂന്നു മീറ്റർ മാറിയേ മതിൽ പണിയാവൂ എന്നുണ്ടെങ്കി​ലും ഒരു മീറ്റർ പോലും വിടാതെയാണിപ്പോൾ നിർമ്മാണം പുരോഗമിക്കുന്നത്. സമീപത്തെ ലോഡ്ജുകാരും ഇതേമാർഗം പിന്തുടർന്നാൽ കാൽനട യാത്രികർ വലയും. ഭക്തർക്ക് വാഹനങ്ങൾ പാർക്ക് ചെയ്യുവാൻ പോലും സ്ഥലമില്ലാത്ത സാഹചര്യത്തിലാണ് പുറമ്പോക്ക് കെട്ടിയടച്ച് പഞ്ചായത്തിന്റെ നിർമ്മാണം.

ടേക്ക് എ ബ്രേക്ക് കെട്ടിട നിർമ്മാണത്തിൽ വീഴ്ചയുണ്ടായോന്ന് അന്വേഷിക്കും.

എം.ആർ.രാജേഷ്

ചോറ്റാനിക്കര ഗ്രാമപഞ്ചായത്ത് പ്രസിഡന്റ്

കളക്ടർ വ്യവസ്ഥകളോടെ അനുവദിച്ച സ്ഥലത്ത് ഗതാഗത തടസത്തിനും അപകടസാധ്യതയ്ക്കു കാരണമാകുന്ന തരത്തിൽ നടക്കുന്ന പണി​കൾക്ക് ആരും മേൽനോട്ടം വഹി​ച്ചതായി​ കാണുന്നി​ല്ല. ചുറ്റുമതിൽ പൊളിച്ച് മാറ്റാൻ പൊതുമരാമത്ത് വകുപ്പ് അടിയന്തരമായി​ ഇടപെടണം.
ജോൺസൺ തോമസ്

മുൻ ഗ്രാമപഞ്ചായത്ത് പ്രസിഡന്റ്