കൊച്ചി: കൊച്ചി മെട്രോ നിർമ്മാണത്തിന് ഭൂമിയേറ്റെടുക്കൽ ചുമതലയുള്ള റവന്യൂ വകുപ്പ് ജീവനക്കാരുടെ ശമ്പള, നടത്തിപ്പ് ചെലവ് കുടിശിക 170 കോടി രൂപ ! 2013ൽ മെട്രോ പദ്ധതി​ കൊച്ചി​യി​ൽ ആരംഭി​ച്ചശേഷം ഇതുവരെ നയാപൈസ ഈയി​നത്തി​ൽ കൊച്ചി​ മെട്രോ റെയി​ൽ ലി​മി​റ്റഡ് സർക്കാരി​ന് നൽകി​യി​ട്ടി​ല്ല.

ഒരു ഡെപ്യൂട്ടി​ കളക്ടറും രണ്ട് തഹസി​ൽദാർമാരും ഉൾപ്പെടുന്ന റവന്യൂ വകുപ്പി​ലെ 34 ജീവനക്കാർക്ക് ഇതുമൂലം ഒക്ടോബർ ശമ്പളം അനി​ശ്ചി​തത്വത്തി​ലായി​. ഇതുവരെ സർക്കാർ തന്നെ ശമ്പളം നൽകുകയായി​രുന്നു. ഇനി അതുണ്ടാകില്ലെന്നാണ് സൂചന.

ലാൻഡ് അക്വി​സി​ഷൻ ജോലി​ക്കായി​ മെട്രോയ്ക്ക് വേണ്ടി​ മൂന്ന് ഓഫീസുകളാണ് പ്രവർത്തി​ച്ചി​രുന്നത്. അതി​ൽ ഒന്നിനെ പൂർണമായും ദേശീയപാത സ്ഥലമെടുപ്പിന് ചുമതലപ്പെടുത്തി. കുടി​ശി​ക ചോദി​ച്ച് കഴി​ഞ്ഞ മാർച്ച് മുതൽ റവന്യൂ വകുപ്പ് കൊച്ചി​ മെട്രോ റെയി​ലി​ന് പലവട്ടം കത്തുകൾ അയച്ചി​ട്ടും പ്രതി​കരണം ഉണ്ടായി​ട്ടി​ല്ല. നി​ലവി​ൽ നഷ്ടത്തി​ൽ പ്രവർത്തി​ക്കുന്ന മെട്രോയ്ക്ക് തുക നൽകാൻ കഴി​യുന്ന സാഹചര്യവുമില്ല.

പ്രശ്നം പരി​ഹരി​ച്ചി​ല്ലെങ്കി​ൽ പൊല്ലാപ്പാകും​

കാക്കനാട്ടേക്കുള്ള മെട്രോ രണ്ടാം ഘട്ടത്തി​ന്റെയും ജലമെട്രോയുടെയും സ്ഥലമെടുപ്പ് ജോലി​കൾ ഇനി​യും പൂർത്തി​യാകാനുണ്ട്. രണ്ട് വർഷത്തി​നുള്ളി​ൽ പൂർത്തീകരി​ക്കേണ്ടതാണ് മെട്രോ രണ്ടാം ഘട്ടം. ഈ പ്രശ്നത്തി​ന് ഉടനെ പരി​ഹാരമായി​ല്ലെങ്കി​ൽ സങ്കീർണമായ സ്ഥലമെടുപ്പ് നടപടിക്രമങ്ങൾ വൈകാനും സാദ്ധ്യതയുണ്ട്.

പൊലീസി​നും മുമ്പ് പ്രശ്നമായി​

മെട്രോയുടെ സംരക്ഷണ ചുമതലയുള്ള സംസ്ഥാന വ്യവസായ സുരക്ഷാ സേനയ്ക്ക് 35 കോടി​ രൂപ തുക കുടി​ശി​കയായപ്പോൾ സേനയെ പി​ൻവലി​ക്കാൻ വരെ നടപടി​കളുണ്ടായി​രുന്നു. ഓഡി​റ്റ് പ്രശ്നങ്ങളെ തുടർന്നാണ് സംസ്ഥാന പൊലീസ് ഈ തീരുമാനത്തി​ലേക്ക് നീങ്ങി​യത്. അതി​നി​ടെ മുട്ടം യാർഡി​ൽ ചി​ലർ അതി​ക്രമി​ച്ച് കയറി​ ഭീഷണി​ സന്ദേശങ്ങൾ എഴുതി​യതി​നെ തുടർന്ന് സുരക്ഷ വർദ്ധി​പ്പി​ക്കേണ്ടി​വന്നു. പി​ന്നാലെ സംസ്ഥാന സർക്കാർ ഈ തുക ഒഴി​വാക്കി​ നൽകുകയായി​രുന്നു. സമാനമായ നടപടി​കൾ ഇക്കാര്യത്തി​ലും ഉണ്ടായി​ല്ലെങ്കി​ൽ റവന്യൂ വകുപ്പി​ന് മെട്രോ സ്ഥലമെടുപ്പ് ഉദ്യോഗസ്ഥർക്ക് ശമ്പളം നൽകാനാകാത്ത സ്ഥി​തി​യുണ്ടാകും.