ഹൈക്കോടതിയിൽ സർക്കാർ വിശദീകരണം

കൊച്ചി: അന്ധവിശ്വാസങ്ങൾക്കും ദുർമന്ത്രവാദത്തിനുമെതിരെ നിയമം കൊണ്ടുവരുമെന്ന് സംസ്ഥാന സർക്കാർ ഇന്നലെ ഹൈക്കോടതിയെ അറിയിച്ചു. ഇലന്തൂർ ഇരട്ട നരബലിയുടെ പശ്ചാത്തലത്തിൽ കേരള യുക്തിവാദി സംഘം നൽകിയ ഹർജിയിന്മേലാണ് വി​ശദീകരണം.

നിയമ നിർമ്മാണത്തിന്റെ നിലവിലെ സ്ഥിതി അറിയിക്കാൻ ചീഫ് ജസ്റ്റിസ് എസ്. മണികുമാർ, ജസ്റ്റിസ് ഷാജി പി. ചാലി എന്നിവരുൾപ്പെട്ട ഡിവിഷൻ ബെഞ്ച് നിർദ്ദേശിച്ചു.ആഭി​ചാരക്രി​യകളും മറ്റും തടയാനുള്ള ബില്ലുകൾ സർക്കാർ പലതവണ തയ്യാറാക്കിയെങ്കിലും നിയമമാക്കിയില്ലെന്നും, ​ കേന്ദ്ര, സംസ്ഥാന സർക്കാരുകളെ പല തവണ സമീപിച്ചെങ്കിലും നിയമനിർമ്മാണത്തിന് നടപടി ഉണ്ടായില്ലെന്നും ഹർജിക്കാർ പറയുന്നു.

ഹർജി​ക്കാരുടെ

മറ്റാവശ്യങ്ങൾ

• ദുർമന്ത്രവാദം തടയാൻ ജസ്റ്റിസ് കെ.ടി. തോമസ് സമർപ്പിച്ച നിയമ പരിഷ്കരണ കമ്മിഷൻ റിപ്പോർട്ട് പരിഗണിക്കണം

• അരനൂറ്റാണ്ടിനിടെ കാണാതായ വ്യക്തികളെക്കുറിച്ച് അന്വേഷി​ക്കാൻ പ്രത്യേക സംഘത്തെ നിയോഗിക്കണം

• ആഭിചാര കേന്ദ്രങ്ങൾ കണ്ടെത്താൻ പൊലീസിനു നിർദ്ദേശം നൽകണം,

• ആഭിചാരക്രിയകളും ദുർമന്ത്രവാദവും പ്രോത്സാഹിപ്പിക്കുന്ന സിനിമകളും ടെലിഫിലിമുകളും തടയണം