പറവൂർ: സൊസൈറ്റി ഓഫ് ഇന്നവേറ്റീവ് റിസർച്ചേഴ്സ് ആൻഡ് അക്കാഡമിഷൻസ്‌ (സിറ), കേരള സർവകലാശാല യു.ജി.സി - ഹ്യുമൺ റിസോഴ്സ് ഡവലപ്മെന്റ് സെന്റർ എന്നിവയുടെ സംയുക്ത ആഭിമുഖ്യത്തിൽ മൂത്തകുന്നം എസ്.എൻ.എം. ട്രെയിനിംഗ് കോളേജിൽ നടന്ന ദ്വിദിന ദേശീയ ഉന്നത വിദ്യാഭ്യാസ സെമിനാർ സമാപിച്ചു. അക്കാഡമിക് റിസർച്ച് പ്രാക്ടീസസ് ഇൻ ഹയർ എഡ്യൂക്കേഷൻ: മൾട്ടി ഡിസിപ്ലിനറി പേഴ്‌സ്‌പെക്ടീവ്സ്‌ ഇൻ നാഷണൽ എഡ്യൂക്കേഷണൽ പോളിസി എന്ന ശീർഷകത്തിലായിരുന്നു സെമിനാർ. സെമിനാറിൽ ഭാരതത്തിലെ വിവിധ സർവകലാശാലകളിൽ നിന്നും കോളേജുകളിൽ നിന്നുമുള്ള അദ്ധ്യാപകരും, ഗവേഷകരും, വിദ്യാർത്ഥികളും പങ്കെടുത്തു. കല, ശാസ്ത്രം, സാഹിത്യം, ഹ്യൂമാനിറ്റീസ്, ടെക്നോളജി, എൻജിനീയറിംഗ്, നിയമം, വിദ്യാഭ്യാസം എന്നീ വിവിധ മേഖലകളിൽ ഇരുനൂറോളം പ്രബന്ധങ്ങൾ അവതരിപ്പിച്ചു. സെമിനാറിന്റെ രണ്ടാ ദിവസം റിസർച്ച് എത്തിക്സ് ഫോർ ക്വാളിറ്റി എൻഹാംഗ്‌ന്റ് എന്ന വിഷയത്തിൽ കേരള സർവകലാശാല വിദ്യാഭ്യാസ വിഭാഗം അസോസിയേറ്റ് പ്രൊഫസർ ഡോ. ടി.വി. ബിന്ദുവും ദേശീയ വിദ്യാഭ്യാസനയവും അക്കാഡമിക ഗവേഷണങ്ങളും എന്ന വിഷയത്തിൽ പാലാ സെന്റ് തോമസ് കോളേജ് ഒഫ് ടീച്ചർ എഡ്യൂക്കേഷൻ അദ്ധ്യാപകൻ ഡോ. ടി.സി. തങ്കച്ചനും, ഡിസൈൻ ഒഫ് എക്സ്പെരിമെന്റ്സ് എന്ന വിഷയത്തിൽ കൊച്ചിൻ യൂണിവേഴ്സിറ്റി ഒഫ് സയൻസ് ആൻഡ് ടെക്‌നോളജി അസോസിയേറ്റ് പ്രൊഫ. ഡോ. ഹരീഷ് എൻ.രാമനാഥനും ചർച്ചകൾ നയിച്ചു. സമാപന സമ്മേളനത്തിൽ സിറ പ്രസിഡന്റ് ഡോ. ടി.സി. തങ്കച്ചൻ അദ്ധ്യക്ഷത വഹിച്ചു. എസ്.എൻ.എം ട്രെയിനിംഗ് കോളേജ് മാനേജർ പ്രൊഫ. ഡോ. വി.ആർ. പ്രകാശം സെമിനാർ പ്രബന്ധസമാഹാരം പ്രകാശനം ചെയ്തു. ഡോ. ഹരീഷ് എൻ. രാമനാഥൻ പ്രബന്ധസമാഹാരം സ്വീകരിച്ചു. സെമിനാർ കോഓർ‌‍ഡിനേറ്റർ ഡോ. എം.ബി. ലയ, പ്രിൻസിപ്പൽ ഡോ. പി.എസ്. സുസ്മിത, സിറ സെക്രട്ടറി ഡോ. സുരമ്യ മത്തായി എന്നിവർ സംസാരിച്ചു.