മൂവാറ്റുപുഴ: നഗരസഭാ കൗൺസിലിന്റെ നേതൃത്വത്തിൽ കേരളപ്പിറവി ദിനമായ നവംബർ ഒന്നിന് നഗരത്തിൽ മനുഷ്യച്ചങ്ങല തീർക്കും. എട്ടു കിലോമീറ്റർ ദൈർഘ്യം വരുന്നചങ്ങലയിൽ വിദ്യാർത്ഥികളടക്കം ജീവിതത്തിന്റെ നാനാതുറകളിലുള്ളവർ കണ്ണികൾ ആകും. മയക്കുമരുന്ന് വില്പനയ്ക്കും ഉപയോഗത്തിനും എതിരെ സംസ്ഥാന വ്യാപകമായി നടന്നുവരുന്ന ബോധവത്കരണ പ്രവർത്തനങ്ങളുടെ ഭാഗമായാണ് ചങ്ങല തീർക്കുന്നതെന്ന് നഗരസഭാ ചെയർമാൻ പി. പി. എൽദോസ് പറഞ്ഞു.

ആശ്രമം ബസ് സ്റ്റാൻഡിൽ നിന്ന് ആരംഭിക്കുന്ന ചങ്ങല പി.ഒ. ജംഗ്ഷൻ, കച്ചേരിത്താഴം, നെഹൃു പാർക്ക്, എവറസ്റ്റ് ജംഗ്ഷൻ, കച്ചേരിപ്പടി, വൺവേ, ചാലിക്കടവ് പാലം, ഈസ്റ്റ് ഗവൺമെന്റ് ഹൈസ്കൂൾ ജംഗ്ഷൻ, നിർമ്മല മെഡിക്കൽ സെന്റർ ജംഗ്ഷൻ, എന്നിവിടങ്ങൾ വഴി ആശ്രമം ബസ്റ്റാൻഡിൽ സമാപിക്കും.സർക്കിൾ രൂപത്തിലാകും ചങ്ങല തീർക്കുക. നിർമ്മല ഹൈസ്കൂൾ, മോഡൽ ഹൈസ്കൂൾ, സെന്റ് അഗസ്റ്റിൻ സ്കൂൾ, മാറാടി ഗവൺമെന്റ് സ്കൂൾ, എസ്.എൻ.ഡി.പി. എച്ച്‌.എസ്.എസ്., ശിവൻകുന്ന് എച്ച്.എസ്.എസ്., ടി.ടി.ഐ., ടൗൺ യുപി സ്കൂൾ, വിവേകാനന്ദ വിദ്യാലയം, സെന്റ് തോമസ് സ്കൂൾ, ഇലാഹിയ പബ്ലിക് സ്കൂൾ, കെ.എം. എൽ. പി. സ്കൂൾ, തർബിയത്ത് ട്രസ്റ്റ് ഹൈസ്കൂൾ, എം.ഐ.ഇ.ടി., കിഴക്കേക്കര ഈസ്റ്റ് ഗവൺമെന്റ് ഹൈസ്കൂൾ എന്നിവിടങ്ങളിൽ നിന്നായി വിദ്യാർത്ഥികൾ ചങ്ങലയിൽ കണ്ണികൾ ആകും.

ഡീൻ കുര്യാക്കോസ് എം.പി., മാത്യു കുഴൽനാടൻ എം.എൽ.എ., കേരള ബാങ്ക് ചെയർമാൻ ഗോപി കോട്ടമുറിക്കൽ, മുൻ എം.എൽ.എ.മാരായ എൽദോ എബ്രഹാം, ജോസഫ് വാഴക്കൻ, ജോണി നെല്ലൂർ, മുൻ എം.പി. കെ. ഫ്രാൻസിസ് ജോർജ്, നഗരസഭാ ചെയർമാൻ പി.പി. എൽദോസ്, വൈസ് ചെയർ പേഴ്സൺ സിനി ബിജു, സ്റ്റാൻഡിംഗ് കമ്മിറ്റി ചെയർമാന്മാരായ അജി മുണ്ടാട്ട്, പി.എം. അബ്ദുൽസലാം, പ്രമീള ഗിരീഷ് കുമാർ, നിസ അഷറഫ് തുടങ്ങിയവർ ചങ്ങലയിൽ പങ്കാളികളാകും.രാവിലെ പത്തിനാണ് മനുഷ്യ ചങ്ങല തീർക്കുക. തുടർന്ന് ലഹരിവിരുദ്ധ പ്രതിജ്ഞ.