രാജാക്കാട്: അജൈവ മാലിന്യ ശേഖരണവും സംസ്‌കരണവും കാര്യക്ഷമാക്കുന്നതിനുള്ള ഹരിതമിത്രം സ്മാർട്ട് ഗാർബേജ് ആപ്ലിക്കേഷൻ പദ്ധതിയ്ക്ക് രാജാക്കാട് പഞ്ചായത്തിൽ തുടക്കമായി. ഹരിതകേരളം മിഷനും ശുചിത്വമിഷനും ചേർന്നാണ് മൊബൈൽ ആപ് മഖേനയുള്ള മോണിറ്ററിംഗ് സംവിധാനം പഞ്ചായത്തിൽ നടപ്പിലാക്കുന്നത്. ഇതിനായി വീടുകളിലും സ്ഥാപനങ്ങളിലും ക്യൂആർ കോഡ് പതിക്കും.
നിലവിൽ ഹരിതകർമ്മസേന വീടുകളിലും സ്ഥാപനങ്ങളിലും കാർഡ് നൽകി അജൈവ മാലിന്യം ശേഖരിച്ചു വരുന്നുണ്ട്. പാഴ് വസ്തു ശേഖരണവും മാലിന്യ സംസ്‌കരണവും മൊബൈൽ ആപ്പിന്റെ നിയന്ത്രണത്തിലേക്ക് എത്തിക്കുന്നതോടെ ഹരിത കർമ്മസേനയുടെ പ്രവർത്തനങ്ങൾ സമയബന്ധിതവും കുറ്റമറ്റതാക്കാനും സാധിക്കും. ഇതിനായി പഞ്ചായത്തിലെ പത്താം വാർഡിനെയാണ് പൈലറ്റ് വാർഡായി തെരഞ്ഞെടുത്തിരിക്കുന്നത്. ഒരു മാസത്തത്തിനകം പഞ്ചായത്തിലെ എല്ലാ വീടുകളിലും സ്മാർട്ട് ഗാർബേജ് മോണിറ്ററിങ് സിസ്റ്റം നടപ്പിലാക്കും.
പഞ്ചായത്ത് പ്രസിഡന്റ് എം. എസ്. സതി പദ്ധതി ഉദ്ഘാടനം ചെയ്തു.ആരോഗ്യ, വിദ്യാഭ്യാസ സ്റ്റാന്റിംഗ് കമ്മറ്റി ചെയർമാൻ ബെന്നി പാലക്കാട്ട് അദ്ധ്യക്ഷത വഹിച്ചു. പദ്ധതിയുടെ ഭാഗമായി ഹരിതകർമ്മ സേനയ്ക്കുള്ള ലാപ്‌ടോപ്പും മൊബൈൽ ഫോണുകളും പഞ്ചായത്ത് പ്രസിഡന്റ് ചടങ്ങിൽ വിതരണം ചെയ്തു.
ബ്ലോക്ക് പഞ്ചായത്ത് അംഗം കിങ്ങിണി രാജേന്ദ്രൻ, വാർഡ് അംഗങ്ങളായ പുഷ്പലത സോമൻ, നിഷ രതീഷ്, സി.ആർ രാജു, ബിൻസു തോമസ്, മിനി ബേബി, പ്രിൻസ് തോമസ്, ദീപ പ്രകാശ്, സുജിത്ത് റ്റി.കെ സി.ഡി.എസ് ചെയർപേഴ്‌സൺ കെ. പി.വത്സ, വി. ഇ. ഒ. നിസാർ എ.പി., എന്നിവർ ചടങ്ങിൽ പങ്കെടുത്തു.