ഇടുക്കി: മാലിന്യ ശേഖരണം കൂടുതൽ കാര്യക്ഷമമാക്കുകയെന്ന ലക്ഷ്യത്തോടെ പള്ളിവാസൽ ഗ്രാമപഞ്ചായത്തിൽ സ്മാർട്ട് ഗാർബേജ് ആപ്പും വീടുകൾ തോറും ക്യൂ ആർ കോഡ് പതിക്കലും അഡ്വ. എ. രാജ എം.എൽ.എ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്റ് വി.ജി. പ്രതീഷ് കുമാർ അദ്ധ്യക്ഷത വഹിച്ചു. മാലിന്യ ശേഖരണത്തിനായി വീടുകളിൽ എത്തുന്ന ഹരിത കർമ്മ സേനാംഗങ്ങൾക്ക് സ്മാർട്ട് ഗാർബേജ് ആപ്പ് വഴി വീടുകളിൽ പതിപ്പിക്കുന്ന ക്യൂ ആർ കോഡ് സ്‌കാൻ ചെയ്യുന്നതിലൂടെ മാലിന്യശേഖരണവുമായി ബന്ധപ്പെട്ട് വിവരങ്ങൾ വേഗത്തിൽ മനസിലാക്കാൻ സാധിക്കും. പഞ്ചായത്ത് പരിധിയിലെ മാലിന്യ ശേഖരണം കാര്യക്ഷമമാക്കുന്നതിനൊപ്പം മാലിന്യ നിക്ഷേപ, ശേഖരണ കാര്യങ്ങളിൽ കുടുംബങ്ങൾക്ക് പഞ്ചായത്തുമായി സംവദിക്കാനും പഞ്ചായത്തിന്റെ പുതിയ പദ്ധതിയിലൂടെ കഴിയും. പഞ്ചായത്ത് ഹാളിൽ നടന്ന ഉദ്ഘാടന ചടങ്ങിൽ ജില്ലാ പഞ്ചായത്തംഗം അഡ്വ. ഭവ്യ കണ്ണൻ, അടിമാലി ബ്ലോക്ക് പഞ്ചായത്തംഗം മിനി ലാലു, പഞ്ചായത്തംഗങ്ങളായ സി.എസ്. അഭിലാഷ്, സുജി ഉല്ലാസ്, ശശികുമാർ, മറ്റ് പഞ്ചായത്തംഗങ്ങൾ, ഗ്രാമ പഞ്ചായത്ത് സെക്രട്ടറി നിസാർ സി.എ, മറ്റ് ഉദ്യോഗസ്ഥ പ്രതിനിധികൾ, രാഷ്ട്രീയ പാർട്ടി പ്രതിനിധികൾ, കുടുംബശ്രീ സി.ഡി.എസ് പ്രവർത്തകർ, ഹരിത കർമ്മ സേനാംഗങ്ങൾ തുടങ്ങിയവർ പങ്കെടുത്തു.